Acabáronse as vendimias
E veñen as esfolladas
Para comer cas rapazas
Catro castañas asadas.
 

    Non chas quero, non chas quero,
    Castañas do teu magosto,
    Non chas quero, non chas quero,
Que me cheiran a chamusco.
 

As castañas no ourizo
Quixo rir e rabeou
Caeu do castaño a baixo
Mira que pago levou.
 

    Non chas quero, non chas quero,
    Castañas do teu magosto,
    Non chas quero, non chas quero,
Que me cheiran a chamusco.
 

Doutro lado do río,
Ten meu pai un castiñeiro,
Dá castañas en agosto,
Uvas pasas en xaneiro.
 

    Non chas quero, non chas quero,
    Castañas do teu magosto,
    Non chas quero, non chas quero,
Que me cheiran a chamusco.
 
 

SECCIÓN  DE  CULTURA  E  MEDIO  AMBIENTE
Fai algúns meses que Martín García (Shambala) deixou a directiva do Club por razóns persoais, aínda que sigue colaborando co Club. A baixa de Martín foi cuberta por Isabel Maestu, quen é a nova Vocal de Cultura e Medio Ambiente. Isabel, ademais das actividades habituais da sección, tamén é a coordinadora do Concurso Fotográfico.

LOTERÍA  NADAL,  18.861
... a xogar! Este ano tamén imos xogar en decembro, pero non falamos agora de xogos populares ou divertidos, trátase da lotería do Nadal, xogamos ó número 18.861, e para que ninguén quede sen a súa porción de fortuna, fixemos as participacións de 3 euros. A terminación é fácil de lembrar, o 61, a mesma cifra que o número de anos de Montañeiros Celtas. Non esquezas pasar polo Club, a sorte espera, só tes que xogar connosco.

TÍTULOS  DÉBEDA
Neste ano 2003 corresponde devolver o segundo prazo da amortización (20% anual durante 5 anos) dos Títulos de Débeda que algúns socios adquiriron, como aportación para a compra do novo local social efectuada no ano 2001. Polo tanto, aqueles socios que adquiriron Títulos, xa teñen a súa disposición cheques nominativos que poden recoller na oficina do Club, ata o 30 de decembro do presente ano. E igual que o pasado ano, aqueles socios que desexen converter os seus Títulos de Débeda en Doazón, haberán de comunicalo expresamente.

II  CONCURSO  DE  FOTOGRAFÍA  DE  MONTAÑA
Xa están enviados os folletos do Concurso a tódolos socios, a os participantes do pasado ano e a tódolos Clubs de Montañismo e de Espeleoloxía de toda España, polo que confiamos en ter garantida a súa difusión, reforzada por estar nas páxinas de internet de Desnivel, Barrabes, etc.
Este ano, como novidade, ademais das fotos premiadas polo xurado, temos a intención de que o público que visite a Exposición (Casa do Libro, do 17 ó 30 de Nadal) vote a mellor foto, de xeito que a “Mellor Foto do Público” será a elixida para editar un calendario do 2004. O público participante entrará nun sorteo para obter un agasallo.
Para o Concurso deste ano queremos animar especialmente os socios do Club, xa que a súa participación a consideramos moi importante, polo que, ademais de optar os importantes premios que figuran nas Bases do Concurso, temos a intención de premiar a mellor foto de entre as presentadas polos socios: “Mellor Foto de socio”.
Na actualidade estamos a estudiar un convenio con VIGOFOTO para obter unha serie de descontos e vantaxes nas tendas desta marca, e como anticipo, estamos a preparar a súa aportación a este Concurso que será: o premio a mellor foto de socio, o agasallo os participantes na votación popular da Exposición, e un interesante desconto para os socios que amplíen, en calquera das tendas de VIGOFOTO, as súas fotografías para presentar ó Concurso.
 Ademais, e como xa fixemos o pasado ano, temos a intención de que tódalas fotografías non seleccionadas para a Exposición, sexan expostas no local do Club.
 

Con motivo da actividade "plantación de landras", pedimos o seguinte os camiñantes: "Aproveitando as vosas pateadas, colleita-las mellores landras, conservádeas nun ambiente húmido, o máis parecido ó bosque de onde as teñas recollido e traédeas ó Club o día 14 de novembro, que as plantaremos coa axuda de Quique, como outros anos".
Por outra parte, o 29 de novembro celebraremos unha xornada de astronomía no Monte Aloia, aínda que supeditada ás condicións meteorolóxicas... Por certo, conto con que os participantes queden a durmir no noso Refuxio, xa que o domingo podemos facer algún percorrido na zona.
Isabel
 
 

MAGOSTO E XOGOS POPULARES

 Non vos esquezades que o sábado 8 e domingo 9 de novembro, tendes unha cita no  noso “chalet” do Aloia. Algúns iremos xa o sábado pola tarde e comeremos as castañas de noite pero por suposto seguiremos ahí ata o domingo pola tarde. O domingo pola mañá xogos e para quen lles apeteza, comida compartida. Por favor anotádevos na lista aberta no Club. Confío que moitos veteranos se achegarán ao refuxio para recordar e gozar entre todos de eses xogos, das castañas e do viño (a modiño).

TROFEOS

Coas miñas compañeiras de fatiga: Rosiña e Nuria, terminamos de limpar e arranxa-los trofeos que están nas vitrinas. Gracias pola vosa axuda. Ultimamente engadiuse a medalla agasallada polo R.S.E.A. Peñalara de Madrid que, ca ocasión de celebrar o seu 90 aniversario, concedeuna a Club Montañeiros Celtas polo seu 60 aniversario.
 

A fundación VIDE (Vigo Deporte) nace da iniciativa do Concello de Vigo e de grandes empresas. Preténdese apoiar ao deporte vigués de base e de elite.
O Club ven de facerse socio desta fundación como grupo deportivo. A primeira parte da actual Campaña Siaeiros, consistía en implicar empresas pequenas a ser partícipe do proxecto, pero non conseguimos o noso cometido. Esas empresas, mediante unha doazón de 200 euros, (100 para o Club e 100 para a fundación), participarían nunha propaganda no Faro de Vigo unha vez á semana e entrarían na guía de Siaeiros, onde se poderían anunciar promocións puntuais. Esas empresas poderán ofrecer un desconto do 5, 10, 20, ou 30 % aos portadores da tarxeta de Siaeiros.
Si hai membros do Club que teñan unha empresa e lles interesa ser membro da fundación, vaise facer un anexo á primeira guía, polo tanto se pode animar. Será unha axuda para o Club, así como unha promoción para a empresa.
No Club teremos á venta a tarxeta de Siaeiros, acompañada do talonario, que son cheques descontos, por 6 euros. Ser Siaeiro, permite ter descontos en moitas tendas ou asistir gratuitamente ou con desconto a certos eventos deportivos... Para máis información hai folletos no Club ou preguntando viva voz.
Se queres ser Siaeiro,  apúntate en  M. Celtas!
F.F.
 

O CAMIÑO DO NORTE. 2ª ETAPA LOURENZANA/MONDOÑEDO/ABADIN, 25 KM

Para esta convocatoria so contamos con 18 participantes, supoñemos que non se animaron porque esta etapa tiña moita subida e asfalto pero a paisaxe merecía a pena.
O sábado 11 de outubro ás 16 horas saiamos con destino Lourenzana, o día era caloroso anque o celo estaba moi nuboso, tanto que chegando a noso destino empezou a lloviznar. Dun tirón fixemos a viaxe, instalámonos no albergue, e como xa visitáramos Lourenzana na 1ª etapa decidimos ir cear e pasear a Mondoñedo, xa que pola mañá do domingo so pararíamos a tomar un café. Reservamos a cea para todos nun restaurante para ás 21.30 h. e  fomos de paseo, non sabemos si era a chuvia pero non había ninguén pola rúa. Chegando á praza da catedral vimos que estaba a porta aberta e entramos cando nos encontramos cunha desagradable sorpresa cun cura que estaba falando cuns feligreses dirixiuse cara nos para dicirnos que non podemos seguir que ten que pechar, lle dixemos que éramos peregrinos e que queríamos ver á Virxe Inglesa,  una preciosa talla de madeira de 1520, e nos contesta que lle da igual que ten que pechar, a pesar de non saber que contestarlle, seguimos adiante, pero el nos apagou a luz, de maneira que so foi entrar e saír. Nos quedamos sorprendidos  do trato recibido, xa que tan so dez minutos houbesen solucionado o tema. “ Temos intención de enviar esta queixa a través de e-mail ao bispado de Lourenzana” xa os diremos o que contestan, seguro que algo insólito.
Seguimos,  a cena foi estupenda e abundante, unha partida ao futbolín e ás 23.30h o autobús levounos ao albergue. Comentar que o compartimos con Dani, un peregrino de  Barcelona que esa mesma mañá nada máis chegar a  Ribadeo xa se puxo a camiñar, todo esto o soubemos porque  veu  cenar connosco.
O domingo, Miguel o noso espertador oficial, tocou diana ás 6 da mañá, almorzamos e ás 7.20h completamente de noite e chovendo empezamos a camiñar, Dani despediuse de todos ás 7h. Durante unha hora camiñamos guiándonos polas lanternas que algúns levaban na fronte, parecíamos A Santa Compaña.
Estes 8 km. ata Mondoñedo, transcorren por unha senda arborada preciosa, apenas un km. de estrada, son os outros 17 km. os que van por asfalto, é unha estrada comarcal que va unindo os moitos pobos polos que pasamos e que case non ten tráfico. O día non nos acompaño para nada, non deixou de chover en todo o recorrido, so nos deu un respiro de unha a dúasda tarde, menos mal que ás 14.30h chegábamos a Abadín. Esto significou que non paramos dende ás 10 h. que saímos de Mondoñedo ata case ás 12.15h que pasamos por unha aldea e un paisano cobizounos no cobertizo á entrada de súa casa, e alí recobramos forzas para o tramo final.
Da paisaxe pouco que dicir, xa o coñecemos todos, so que un día como o que nos tocou de ceogris, sen una gota de vento, nubes entre a montaña e chuvia incesante agrandaba a beleza da zona.
Antes de saír para Vigo, cambiámonos a roupa e o calzado, porque anque íamos preparados, 7 horas chovendo non hai nada que poda con elas, pero esto non nos detén,  xa estamos pensando na terceira etapa, animádevos, o pasamos ben.
Elva

GR. 58 SENDEIRO DAS GREAS

O domingo 21 de setembro continuamos co noso calendario oficial de saídas de sendeirismo, tralo peche do club durante o mes de agosto. A ruta, dentro do sendeiro das Greas, esténdese ao  longo de 24 km., dende o alto de Confurco ata Cuartos de Borbén (Pontevedra).
Á 8,30 horas, cun tempo excelente, saímos en autobús 18 participantes para chegar en menos de media hora ao noso punto de partida, Confurco. Comezamos cunha pequena ascensión rodeados de pinos e eucaliptos para, ao pouco tempo, descubri-las canteiras de granito de Porriño. Seguimos ata bordea-lo Salgueirón (619 m) e apreciar a panorámica, dun lado o aeroporto de Vigo, Puxeiros e doutro, a zona de Ponteareas. Un pequeno piscolabis e continuamos camiño seguidos por uns nuboeiros que, en principio, non presaxiaban nada bo; falsa alarma, caeron tan só unhas gotas. Ascendemos ao Galleiro (744 m). Tras contempla-las bonitas vistas da ría de Vigo con Arcade ao fondo e a zona de Ponteareas descendemos para continuar o camiño ata que, sobre as 14,00 horas detémonos para comer nun prado rodeados de árbores. Alí, tras un largo descanso que deu tempo para  a tertulia e unha boa sobada,  nos diriximos en dirección a Sequeiros, seguindo o curso do río Borbén, para finalizar no Club Social de Cuartos de Borbén tomando unha cervexa.
Conchi Gilino
 

MANUEL MARTÍNEZ BARCIA
Seguindo a pauta iniciada o pasado ano, de dedicar cada edición do Concurso a unha figura da nosa Sociedade que se teña distinguida pola súa afección á fotografía, o presente Certamen o dedicamos a Manuel Martínez Barcia, persoa que destacou nas actividades de Montañeiros Celtas durante as décadas dos anos sesenta e setenta, moi especialmente na práctica da espeleoloxía e pola súa labor na tarefa de propagar as belezas que encerra o mundo subterráneo.
Manolo fixo as súas primeiras armas no Club como afeccionado á montaña, sobre a cal foi infatigable camiñante, para pouco a pouco interesarse pola apasionante e descoñecida presencia que ofrecen covas e simas, pasando a formar parte do grupo de pioneiros desta actividade científico-deportiva en Galicia.
Do seu dilatado historial destaquemos o feito de ser Presidente, durante os anos 1973-1981 do Comité Regional Galego de Espeleoloxía, despois Sección Galega de Espeleoloxía, e en varias épocas Director do Grupo de Exploracións Subterráneas de Montañeiros Celtas
E non só no aspecto fotográfico deixounos bo recordo, seno tamén como topógrafo afeccionado, dirixindo moitas das actividades do equipo de G.E.S.Celtas. Levantou o plano das Covas do Rei Cintolo, ou a campaña que baixo o nome de Operación Caurel, tamén organizada polo noso Club en 1972, levouse a cabo na lucense serra con excelente resultado.
Aquelas recordadas reunións con Manolo, sempre en compañía da súa inseparable e animosa Amparo Sánchez, en charlas e leccións sobre covas, derrochando ambos simpatía e ganas de traballar, eran un estímulo para todos.

CONCURSOS FOTOGRÁFICOS
Os concursos fotográficos sempre tiveron especial importancia na historia de Montañeiros Celtas, como medio esencial para fomentar o cultivo de actividade tan complementaria no noso deporte e para dar a coñecer ao gran público as belezas que encerra a montaña e a natureza en xeral.
Xa en 1942, primeiro ano da existencia do Club, organizouse o Iº Concurso Social de Fotografía, soamente para asociados celtas, ampliándose dous anos máis tarde o Concurso Nacional de Fotografía de Montaña, aberto a tódolos afeccionados e con difusión en todo o país, converténdose pola súa importancia e calidade en destacado acontecemento artístico e cita anual obrigada no Vigo cultural de entón.
Entre os seus éxitos temos que recordar o celebrado no 1955, no cal coa ampliación dunha mostra de fotos obtidas na primeira exploración das Grutas do Cintolo, obtivo unhas cotas de audiencia descoñecidas por entón. Outra a destacar é a de 1956, con 237 obras presentadas, récord que nunca foi superado. E en 1959, data na que o XII Concurso Nacional de Fotografía ampliouse co Iº Concurso de Diapositivas en Cor, da que a importancia e interese é boa mostra a participación no acto inaugural de autoridades civís, militares e sociais da nosa xurisdicción.
A última edición nesta primeira época foi có XXVI Concurso Nacional de Fotografía e XV de Diapositivas en cor.
Chito Veiga
 

Por fin Ancares! Xa lle tiña ganas. Saímos do Club ás 8 da mañá, pero para estas cousas paga a pena madrugar, aínda que fose co prognóstico de chuvia que ameazaba o fin de semana.
Partimos de Porto Ancares, non sen antes meterlle algo ó estómago e gozando do sol que de cando en vez se deixaba ver; cousa que algún aproveitou para luci-lo seu corpo e poñerse uns pantalóns curtos...Emilio ¡que pernas!..
O primeiro cumio que alcanzamos foi o Cuíña, dende alí cresteamos ata o Pena Longa e finalmente subimos ata o Mustallar. As vistas eran impresionantes, alá o fondo Burbia, máis alá os lagos... e ata un numeroso grupo de rebecos.
Xa encomezaba a caer o día e buscamos onde durmir. Atopamos un recoveco onde montamos as tendas. (Facer mención os catro valentes que durmiron ó “pairo”). Pola noite empezou a chover e soprar algún vento.
O día seguinte aínda era noite cando espertei. Mentres recollíamos as  tendas molladas, foi  abrindo o día e puiden comprobar que o domingo non íamos ter a sorte do sábado... ¡Estaba petado de néboa!
Reiniciamos a travesía cara o Pico Lanzas, todos xuntiños, que non se perda ninguén...!, continuamos ata o Corno Maldito... e maldito o tempo, o GPS, o compás... Dende este punto xa foi todo unha aventura, para adiante, para atrás, campo a través, algunha que outra caída...Atención! Xa chega Emilio coa crema dos golpes... Todo controlado!
Seguimos... ¿Perdidos? Non! Atrapados pola néboa e tamén mollados. Finalmente chegamos ó punto onde máis ou menos nos ía recoller o autobús. Non preguntar como! A idea era subir o Tres Bispos, pero a cambio, abrimos novas rutas polos Ancares, onde os sendeiros son marabillosos.

EXCURSIÓN AOS PERINEOS

Ás doce da noite, esperábamos o autobús, que tras catorce horas e media de viaxe, nos levou ao albergue de “Gavarnie”.
Chegamos ao atardecer, e montamos a tenda. O redor de onde estábamos nós, víanse montañas, máis lonxe, o glaciar e a catarata de trescentos metros, e por enriba os picos nevados. As excursións, eran a elixir, ir ao pobo, unha andaina curta... Nós nos levantábamos ás seis e media da mañá, boa hora para camiñar, xa que case non daba o sol, almorzábamos no albergue pan con leite, e preparábamos a mochila de ataque, onde se levaba a comida e o traxe de baño, pois sempre había un lago onde refrescarse; e botamos a andar.
Camiñamos entre vales, árbores, cruzamos ríos... e chegamos á catarata de trescentos metros. Todo xeado e esvaradío. Papá e eu, escalamos o precipicio, ata poñernos debaixo da catarata. ¡Con que forza caía!
Outro día da marabillosa estancia nos Perineos, fomos ao Vignemale, situado a 3298 metros de altura. Un glaciar, é unha gran cantidade de xeo que nunca se derrete, polo que pasamos nós, pero para a nosa protección, levábamos “crampóns”, que son uns pinchos que se engaden á bota, e “piolet”, que é unha especie de bastón cun pincho, para camiñar mellor. O estivemos cruzando máis ou menos durante dúas horas, e logo, empezamos a escalar polo pico rochedo. Cando chegamos arriba, Conchi nos mandou que firmáramos.
Dende esa altura, víase todo como un mapa; os lagos, as montañas, os vales, os campos...
Foi un experiencia INESQUECIBLE.
Gabriela Freiría (13 anos)

Modalidade: Dificultade a vista e Bloque
Data: 22 e 23 de novembro (Proba da FEDME para detección de novos talentos)
Lugar: Rocódromo Municipal de Riazor (Frontón), A Coruña.
Horarios sábado, 22: Eliminatorias de 11 a 15 h., Finais de 17 a 21 h.
Zona de quentamento: abrirase 90 minutos antes de cada proba. Na proba de dificultade a vista, teranse 6 minutos para visualizar a vía todos xuntos.
Innscricións: na FGM ata o 20 de novembro. Cuota: 20 euros.
 

Como comezo de temporada faremos unhas xornadas de iniciación o esquí de montaña, que dividiremos en dúas partes: unha charla teórica no local na que veremos o material e a progresión no esquí de montaña e unha saída de fin de semana a estación invernal de San Isidro para iniciarse no esquí o tomar contacto con iso de “foquear”. Tamén temos previsto realizar un curso de “esquí en neves non tratadas” ou sexa, esquí fora de pista, o numero máximo de prazas será de seis persoas sendo necesario ter un nivel aceptable de esquí en paralelo e licencia que asegure o esquí fora das pistas, ademais faremos dúas travesías pola cordilleira Cantábrica e participaremos na “II Percorrido Montañas de Trevinca” e na “XX Alta Ruta Cántabra” nos Picos de Europa. Xa sabedes, encerade as vosas táboas e ide quentando motores.
Marcos
 

 MEDALLA PEÑALARA, CATEGORÍA ORO

En 1913 fundase a asociación Peñalara: Los doce amigos, nome que basease no cumio máis elevado da serra de Guadarrama y no seu número de integrantes: exactamente doce amantes da natureza, a montaña, e o deporte que durante moito tempo deu en clamarse Alpinismo.
Este ano a R.S.E.A. PEÑALARA celebra o seu 90 aniversario, e invitáronnos a súa festa, xa que concederon a Club Montañeiros Celtas a súa máxima distinción, a “MEDALLA PEÑALARA, categoría ORO”, polos 60 anos de historia do noso Club. Correspondendo a este honor, asistín, acompañado por Fernando Fdez. Rey, o pasado día 18 de outubro a súa “Fiesta 90 Aniversario” no Albergue de Navacerrada (Madrid), para recibir persoalmente, no nome do Club, este galardón que nos alaga.
O remate da comida, se entregaron as correspondentes medallas os seus socios máis veteranos (destacar a entregada persoalmente a Manuel Correa de 96 años y 80 de antigüidade) e a aqueles organismos e persoas que pola súa labor e actividade son de recoñecemento dentro do mundo montañeiro.
O recibir a Medalla de Ouro, nos lles correspondemos cun agasallo que consistiu nun Peregrín de Sargadelos e placa conmemorativa. Nun breve discurso resumín a importancia de Montañeiros Celtas no contesto nacional comentando que recibiu en dúas ocasións o emblemático Premio Julián Delgado Úbeda (1966 e 1978) da F.E.M. e fixen lectura dun dos textos que Chito ten escrito para o futuro Libro da Historia do Club, o seguinte:
“Tal vez el hecho más destacado en las actuaciones de los montañeros vigueses en este año 1942, fue la participación en el mes de julio de Eduardo Blanco Aguilar y Emilio Giraldes Álvarez, en el Iº Campamento Nacional de Alta Montaña de la Federación Española de Montañismo, organizado en el macizo del Aneto y en el que ostentaban la representación oficial de nuestro Club. Esto es interesante de destacar, puesto que a lo largo de la historia de este Campamento Nacional, iniciado como vemos este año 1942, el Club Montañeiros Celtas es una  de las 6 entidades que más veces y con mayor número de representantes ha participado en el máximo certamen nacional.
En la ocasión que nos ocupa los dos vigueses ascienden la máxima cumbre pirenaica, el Aneto y otras cumbres del contorno, en compañía de miembros del Centro Excursionista de Cataluña y del Grupo de Alta Montaña de Peñalara de Madrid. Es con miembros de este último Grupo con quien establecen contacto, comprometiéndose dos de ellos, Baldomero Sol y Enrique Herreros, el excelente dibujante  humorista y posteriormente director de cine, en venir a nuestra ciudad para instruir en las técnicas de escalada a los aficionados vigueses.
En este sentido se efectúan en el Galiñeiro, el 8 de noviembre, las primeras sesiones de escalada, teniendo su continuación el siguiente año, el 4 de abril, con nuevas prácticas en las rocas de nuestro Galiñeiro, así como de descenso en rappel.”
Agradecín o apoio de Peñalara o noso Club nos seus inicios, a Medalla que agora nos conceden e felicitei os “peñalaros” polos seus 90 anos de brillante historia.
O final, Fernando e máis eu tivemos a oportunidade de conversar con moitos veteranos que preguntábannos sobre todo polos “irmáns Veiga”, entre eles: Antonio Flores, Antonio López Llorca, Salvador Vecino... tamén tivemos a sorte de falar con algúns personaxes ilustres como Eduardo Martínez de Pisón, Cesar Pérez de Tudela, o incombustible alpinista Carlos Soria... ademais de membros da directiva como o presidente Pepe Hurtado e os vicepresidentes Carlos Soler e Jesús Vázquez (que como galego, foi o noso valedor para a Medalla)

20-21 setembro: VII Campamento Galego Infantil-Xuvenil de Espeleoloxía
De novo tocounos organiza-lo VII Campamento infantil-xuvenil da F.G.E. Este ano quixemos que os rapaces coñeceran outro tipo de cavidades e fómonos ás furnas da península do Morrazo. Non sabemos se foi esta nova perspectiva ou que outra cousa pero o certo é que se anotaron 30 rapaces e rapazas dispostos a divertirse a fin de semana facendo unha espéleo diferente.
O sábado ás 10:30h e para empeza-la diversión, viaxe en barco ata Cangas. Alí pateo ata o cámping de Liméns por un sendeiro á beira do mar, gozando da paisaxe e compañía dos demais.
Chegouse ó cámping, onde xa nos esperaban as mochilas e as tendas dispostas para poñer en práctica os coñecementos de cada un para montalas. Coa axuda dos monitores montáronse xusto a tempo para meterse nelas antes de que empezara a caer un bo chaparrón sobre nós. Aproveitamos xa para comer e despois, cuns raios de sol, preparámo-los bañadores e toallas para irnos de furnas. A primeira en visitar foi a Furna do Caño ou do Pirata, onde gozamos para entrar na furna dun primeiro baño algo fresco pero que non debeu selo tanto, porque o aproveitaron dando saltos e máis saltos na auga.
Como aínda quedamos con máis gañas de furnas, fómonos a facer unha “travesía” á Furna do Lago. Cos cascos postos e con máis ilusión aínda entramos por un sitio, pasamos arrastrados por un pequeno laguiño e saímos por outro lado. Tanto lles gustou que querían repetir.
Xa con algo de fame, voltamos ó cámping. Ceamos, charlamos e intentamos durmir algo cando os rapaces nos deixaban. Á mañá seguinte, algún que outro esforzo para sacalos do saco e darlles o almorzo. Preparámo-lo material para ir a Furna de Santa Marta mentres os rapaces facían os seus preparativos.
Na furna instalamos unha corda para que os máis maiores ou os que xa controlaban algo de vertical baixaran ó fondo. Nas inmediacións instalamos outras cordas nunhas árbores para que os rapaces probaran as técnicas de vertical. Algo de ilusión e medo mezclouse nos seus ánimos pero ó final todos repetiron, incluso máis dunha vez.
Para completa-la actividade montamos unha tirolina que fixo as delicias dos rapaces e incluso tivemos a visita da televisión de Ponteareas que tomou imaxen das actividades que desenvolvían os rapaces (a emisión será en inverno, pero non sabemos cando).
Cando a fame empezou a “morder” voltamos ó cámping, onde Emilio, Conchi e algúns rapaces voluntarios,  se encargaron de facer uns espaguetes que deboramos todos con rapidez.
Recollemos despois as mochilas e as tendas e xuntámonos para o reparto de agasallos ós participantes e tamén ós colaboradores. Clausurámo-lo campamento cunhas palabras do presidente da F.G.E, Juan Prego, que destacou toda a labor feita cos rapaces.
Volta a Cangas andando para colle-lo barco e algo máis cansos pero coa mesma ilusión ou máis chegamos a Vigo, onde xa preguntaban cando sería a próxima saída.
Graciñas a tódolos participantes e ós que axudaron a que o pasaran tan ben.¡¡¡Verémonos na próxima!!!
 

11-12 de outubro: Xornadas monográficas de morfoloxía de cavidades
Este ano, as xornadas monográficas que anualmente organiza o GES, adicouse á morfoloxía das cavidades cársicas. Celebrouse os pasados días 11 e 12 de Outubro, na localidade de Santalla de Arriba (no val do Lóuzara, Samos).
A actividade apuntouse pouca xente. Seis en total. Seis espeleólogos que aínda de saberse moi ben esta lección, decidiron repasa-la en conxunto, dándolle un toque diferente a habitual saída espeleolóxica de fin de semana.
Visitáronse a Cova do Carballo, Cova de Cocidos, Cova do Muiño do Carballo e a Cova do Cruce. Na primeira cavidade, puideron observa-la formación das galerías, orixinando varios niveis, xunto con meandros. Todo elo, despois dun breve repaso da orixe da caliza e dolomía (rochas onde se desenvolven predominantemente as covas). Tamén se pararon a contemplar diferentes formacións (estalagmitas, estalactitas, columnas, coladas, bandeiras, gours, excéntricas,…) e a súa xénese, e a relación co resto dos conductos endocársicos; sen esquecerse do papel dos sedimentos detríticos dentro deste modelado.
Despois de durmir nunha chopeira ó carón do pobo, retomaron as actividades. En Cocidos, percorreron unha cavidade que se desenvolve no contacto entre calizas e pizarras, observando grandes aportes detríticos, vetas de cristalización de calcita e paredes de conglomerado tipo pudigna.
Logo visitaron a cova do Muiño do Carballo, cavidade de réxime activo que na súa boca constitúe unha surxencia. Para remata-la faena, adentrouse na pequena Cova do Cruce.
Logo de despedirse dos veciños do pobo, que moi ben nos atenderon e nos deixaron un campo para durmir, voltamos cara Vigo, para acostarnos sabendo unha cousa máis…

OUTRAS ACTIVIDADES
A nosa espeleóloga, con máis proxección de futuro como diría Xabier, largóusenos ó Sur. Si, como quen non quere a cousa, foi dar unha volta e non desaproveitou a ocasión de visita-la sima G.E.S. e face-la travesía de Ramblazo-Motillas. ¡Non hai como ter vos colegas! Noraboa Pilar.
 

Espeleonovas

· 22-23 novembro. XVI Campamento Galego de Descenso de Canóns. Celebrarase no río Mougás, en Oia. Desta vez o neopreno será imprescindible que sexa de 5 mm. Mínimo.

· 15-16 novembro. Xuntanza técnica e Asemblea da E.G.E.

· 29-30 novembro. Campamento social de espeleoloxía. (en Cobas)

· 6-8 decembro. Campamento Galego Extraterritorial. Espinosa de los Monteros (Burgos)

· 6-8 decembro. IX Congreso Español de Espeleoloxía
 

Atención:
Como xa sabedes, estamos tódolos xoves de 20:30 a 22h para que poidades contactar telefonicamente ou baixando polo club, para vos informar dalgunha actividade. NO MESMO HORARIO REALIZARASE O PRÉSTAMO E DEVOLUCIÓN DE MATERIAL
A Sección
 

PRÁCTICAS DE MAR

O pasado 18 de outubro se encontraron no barco da Escola Galega de Actividades Subacuáticas (EGAS) dúas integrantes da nosa Sección: Berta e Pilar. Berta ía realizar a súa primeira práctica de mar del curso de mergullador de unha estrela, mentres que Pilar tiña pendente a derradeira do de dous estrelas.
Non sen sobresaltos, pois esmagouse o barco na metade da Ría e choveu case toda a mañá, as dúas aprobaron as súas respectivas prácticas. Así que dentro de pouco teremos unha nova mergulladora e xa temos outra un pouquiño, pero só un pouquiño, mais experimentada.

FE DE ERRATAS

No boletín do mes pasado no artigo titulado "O mergullo mais profundo do mundo" dicíase: "Durante o pasado mes de agosto, tivo lugar no macizo de Arábiga (República de Abkhazia, Xeorxia)...". A errata é precisamente esta, pois oficialmente a República de Abkhazia non existe, sino que pertence á República de Xeorxia. Ambas estiveron sumidas nunha guerra durante anos, na que tamén interviñeron os intereses rusos. Por tanto, debería dicir: "Durante o pasado mes de agosto, tivo lugar no macizo de Arábika (República de Xeorxia)...".
Así mesmo, sería importante sinalar que o que primeiro chegou ó outro lado do sifón a o que se fai mención en dito artigo, foi Oleg Klimchuk. Este espéleomergullador ucraíno viña de Crimea, de onde viña de atravesar outro sifón que se lle resistira ós mergulladores soviéticos durante años.

INMERSIÓN

Comunicase a tódolos interesados que o próximo 16 de novembro a Sección ten programada unha inmersión. Din que á terceira vai a vencida, así que esperemos que ningún contratempo nos impida gozar do mar, xa que as dúas anteriores inmersións tiveron que ser aprazadas.
Mergullaremos nos fondos da Ría de Vigo. Sairemos do peirao do R.C.N. de Vigo ás dez da mañá e nos acercaremos en zodiaK ata o lugar da inmersión. O prezo é de aproximadamente 20 euros, con botella incluída, e existe a posibilidade de alugar material.
 A lista está aberta. Non dubidedes en consultar calquera dubida coa Sección.
A Sub-virulillas

Venres,  7 novembro "PRESTIGE, un ano despois": exposición da situación actual, fotografías, etc. por "Voluntarios   NUNCA MAIS de Vigo". No Club ás  20:30 h.

Martes, 11 novembro “Montañas e montañeiros, unha íntima relación”, por Sechu. Conferencia da Agrupación de Centros  Deportivos e Culturais (ACDC) de Vigo, no Centro Cultural Helio de Bembrive ás 20.30 h

Venres, 14 novembro  Xornada de "plantación de landras", a cargo de "Quique". No Club  ás 20:30 h.

Venres, 21 novembro “Khan Tengry (7.010 m). Ascensión pola cara norte”, por Eduardo Portela e Juan Parada. Proxección de  diapos. No Club, ás 20.30 h.

Venres, 28 novembro “Marrrocos, de norte a sur”, por Xavi Posa. Proxección de diapos. No Club, ás 20.30 h.

Venres, 12 decembro “O fascinante mundo dos Cogumelos”, por José Luis Tomé Ortega, presidente da Agrupación   Micolóxica A Zarrota. Proxección de diapos e degustación do prato “Pote das Meigas”. No Club, ás 20.30 h

Do 17 ó 30 decembro Exposición Fotográfica do “II Concurso de Fotografía de Montaña” e imaxes de Manuel Martínez   Barcia. Na Casa do Libro, de 9.30 h a 21.30 h. Diario, excepto día 25.

Venres, 19 decembro Entrega de premios do “II Concurso de Fotografía de Montaña” e homenaxe a “Manuel Martínez   Barcia”. Na Casa do Libro, ás 19.30 h.

Venres, 19 decembro “Festa fin de temporada”. No Club, ás 21.00 h
 

 
NOV
 7 Local social Charla: "PRESTIGE, un ano despois"  S. Cultura e Medio Ambiente
 8-9 Monte Aloia Magosto Social S. Actividades Sociais
 8-9 Abadín O Camiño do Norte. Etapa III: Abadín-Villalba S.D. Sendeirismo
 14 Local social Xornada de "plantación de landras" S. Cultura e Medio Ambiente
 15-16 Monte Aloia Xornadas Técnicas Espéleo  EGE
 16 Ría de Vigo Inmersión Submarina S.D. Actividades Subacuáticas
 16 Alto do Confurco Sendeiro das Greas GR 58. Etapa IV S.D. Sendeirismo
 21 Local social Proxección diapos: “Khan Tengry, cara norte” S. Actividades Sociais
 22-23 Mougás XIV Campamento Galego Descenso de Canóns FGE - GES Celtas
 23 San Xurxo de Sacos Marcha de Outono S.D. Montañismo
 28 Local social Proxección diapos: “Marrrocos, de norte a sur” S. Actividades Sociais
 29-30 Trevinca Campamento Infantil de Inverno S. Infantil-Xuvenil
 29-30 Serra de Seixo Travesía: Prado Alvar- Chandresa S.D. Montañismo
 29-30 Cobas Campamento Social de Espeleoloxía S.D. Espeleoloxía
 29-30 Monte Aloia Xornada de Astronomía S. Cultura e Medio Ambiente
 
DEC
 6-8 Aquilianos (León)  Travesía: Médulas - Aguiana - Peñalva  S.D. Montañismo
 6-8 Espinosa (Burgos) IV Campamento Extraterritorial Espeleoloxía  FGE
 12 Local social "O fascinante mundo dos Cogumelos" S. Actividades Sociais
 14 Vilanova de Cerveira Camiños Lusos. PR Trilho Celta S.D. Sendeirismo
 19 Casa do Libro, Vigo Premios Fotografía e Homenaxe a M. Martínez S. Actividades Sociais
 19 Local Social Festa Fin Temporada  S. Actividades Sociais
 
 

Para comunicarse có club, a dirección é info@celtas.net.

Modifiquei esta páxina por última vez en novembro de 2003.