Pirineo Oriental
Ponte da Constitución 6
ó 9 de decembro de 2001
Ademais da actividade montañeira, está
prevista a visita ós bosques de faias e abetos do pirineo
Navarro-Oriental e Aragón Occidental, chamados Selvas pola súa
frondosidade e tamaño.
O aloxamento realizarase en albergue na vila
de Zuriza. As prazas de cama son limitadas, anque suficientes, polo que
hai que apuntarse con antelación ás mesmas. O seu prezo son
unhas 1100 ptas noite. Ten lugar para facer comidas e tamén se pode
comer menú no mesmo.
Realizarase a saída da actividade o Mércores
5 pola noite e ó chegar a Navarra deixarémo-los vultos no
albergue no que pernoctaremos.
Xoves - 6 de Decembro
Realizarase unha ruta curta de 14 Km polo GR11
desde Zuriza (1.227m) cara á selva de OZA (1.140m), pasando pola
collada de Petraficha (1.950m). Poderase, á volta, ve-la posibilidade,
se o tempo o permite, de visita-la vila de Hecho o Ansó. 4,5h. (Dificultade
Media).
Venres - 7 de Decembro
Saída desde o Túnel o puerto de
Larrau (1.573m) cara ós pastos do Orhi, onde ascenderemos ó
pico (2.021m) 1 h, cumio da etapa; paso polo alto de Laupeña é
unha fenda afiada cara ó pico Zapigaña (1.765 m) e descender
ó collado de Tarta, 1.431m. Desde este e parcialmente pola pista
e a través de bosque chegaremos á Ermita de nuestra Señora
de las nieves (890m) 4,5 h no centro da selva de Iratí, por onde
pasearemos bordeando o encoro de Irabia, e tomando o GR11 subiremos a 1200
m para baixar cara á fábrica de Orbaizeta (840 m) 8,5 h,
onde nos recollerá o Bus. (Dificultade Media-Alta pola súa
lonxitude e un paso lixeiramente complicado). Opción de facer soamente
o recorrido desde a Ermita de nuestra Señora de las nieves á
Fábrica de Orbaizeta (16 Km). (Dificultade Media-Baixa), se existe
suficiente xente para realizala.
Sábado - 8 de Decembro
Opción 1ª: (Dificultade Alta) Piedra
de San Martín (1.775m) Pico Anie (2.507m) 4 horas - Mesa de los
Tres Reyes (2.428m) 5,5 horas - Zuriza (1.200m) 9h. aprox. a marcha montañeira.
Pásase por territorio Francés
Opción 2ª: (Dificultade Media) Ruta
de GR-11 desde Zuriza (1.227m) cunha forte subida cara a Piña
Ezcaurri (2.047m) 1 h. Despois do primeiro quilómetro de baixada,
descende suavemente cara a Isaba (814m). 5h. Total: 15 Km
SECCIÓN DE CULTURA
SAÍDA XEOLÓGICA
TERTULIA
A do mes de Setembro tivo como tema: ¿Estudiar é traballar?.
Houbo unha alta participación e as conclusións principais
foron:
Todo depende do traballo e do xefe que se teña, da materia e
do profesor, do diñeiro dispoñible en cada situación.
Próxima Tertulia o primeiro Xoves de Novembro e o tema
a tratar será:
¿É montañismo o sendeirismo?.
CONCURSO FOTOGRÁFICO
Primeiro premio categoría Maiores:
Pablo Novoa Figueiredo
Segundo premio categoría Maiores:
Juan Carlos Sanz Toquero
Primeiro premio categoría Xuvenil:
Elena Prego Bustabad
A categoría infantil foi declarada deserta.
ACTIVIDADE BOTÁNICA
Farase unha charla e prácticas de xerminación e plantación de sementes de árbores en especial a do Carballo, a nosa querida señora landra. Venres 9 ás 20:30 h. Actividade coordinada por Quique García, que xa colaborou nunha similar de gran éxito hai uns anos no Club.
SEMANA DO TÍBET
Celebraremos unhas actividades especiais en relación con este país, tan próximo para os montañeiros a pesar do seu afastamento. País de cultura milenaria pacífica, e de paisaxes naturais únicas, sometido á forza polos Chineses e que está ó borde da súa aniquilación en moitos aspectos.
Venres 16 ás 20:30 h. conferencia sobre O Tíbet
a súa cultura e situación actual dada polo autor destas
liñas en base as miñas viaxes e contactos sobre o tema.
11 ó 16, haberá unha pequena exposición de fotografías
sobre o Tíbet no local social.
Martín García (Shambala)
INFORMACIÓN XERAL DO CLUB
Lotería de Nadal nº 3.960
Este ano decidimos distribuír participacións
de lotería de Nadal a 500 pts cada unha. Pensando no vindeiro ano,
60 Aniversario do Club, eliximos esa terminación atopando o número
3.960, co que desexamos repartir moita sorte.
Envío do Boletín
Estamos actualizando a base de datos dos socios
polo que no envío do Boletín pódense producir algunhas
anomalías, especialmente no caso de socios co mesmo enderezo. Esperamos
desculpedes as molestias.
Teléfono
Xurdiu un problema inesperado coa liña
telefónica. Cando o cambio previsto era para o día 1 de outubro,
infórmannos de que temos que cambiar de número pois o novo
enderezo depende de outra central. É un contratempo ter cambiar
pero xurde a posibilidade, aínda que difícil, de mante-lo
número. E aínda hoxe esperamos a resposta de telefónica.
Sentimos os inconvintes sufridos polos socios
e esperamos resolver esta situación o antes posíbel.
EXPEDICIÓN LEVADA 2001
SECCIÓN DE MONTAÑA
Xistral
(Vai por ti GASPAR)
Máis que pola serra en si, é polo respecto que a túa persoa me merece, o que me empuxou a volver a intentalo, e á 3ª foi a vencida. Tamén gracias a Miguel C. por ensinarme a desenvolver e a gozar desta magnífica natureza que é Galicia.
Sábado 1 de setembro. Coruxos 660 mts. Ás 10 da mañá
dispoñémonos a saír da tenda, está parando
de chover, metémo-los chuvasqueiros na mochila, á man por
se acaso o tempo cambia, saímos ó día é iniciámo-la
marcha vai un vento forte e os cumios non se divisan, á media hora
de marcha sobre unha pista pequena que atravesa unha pequena ponte e ó
final desta comezamos ascender, as veces poalla un pouco, temos sorte o
tempo despexa máis rápido do que nós ascendemos. Aínda
sabendo que hai unha senda cerca acurtamos terreo monte través para
acurtar distancias, a vexetación é curta e sorteámo-lo
bosque pola súa marxe esquerda na dirección da nosa marcha
ata que máis adiante encontrámola, está case despexado
e vai un forte vento mentres subimos cara ó 1º Control
Colo de Lagoa 999 mts. Sorteámo-la valla e subimos pegados
a ela, a pendente é forte, deixámo-lo sendeiro que sortea
esta montaña a media cota pola súa marxe esquerda Joel xoga
a trabarme los pés, algunha vez o pesco. Noa cumio divisámo-lo
seguinte control e dirixímonos cara el baixamos un pouco ata encontrarnos
de novo coa senda que máis tarde converterase en pista de montaña,
á nosa esquerda a baixada cara a un val dun 400 mts.
de desnivel, hai cantidade de vacas, Joel refúxiase co meu corpo
pois pasamos ó carón delas están tombadas, pastando
nin se inmutan.
Subimos ó 2º control Cadramón 1056 mts. Saudamos
ós modernos muíños de vento, facémo-la foto
de rigor e baixamos uns cantos metros para abeirarnos do forte vento para
comer e descansar un pouco. Está despexado sobre nós, ó
norte e sobre a liña do horizonte vese unha densa franxa de nubes,
O Xistral é unha fábrica de tempestades pois está
a uns 25 km. Do Cantábrico e cando sopra vento norte o choque
húmido do aire que vén dó mar confórmaas.
Volvemos sobre os nosos pasos e dirixímonos cara ó
3º control Monte Xistral 1032 mt. Volvendo a pasa-la cerca polo
alto de Seixo Branco pódese seguir unha senda que vai pegada á
valla que chega ata case o mesmo monte Xistral anque decidimos cortar polo
san e seguir en liña recta, non hai desnivel e pódese acurtar
terreo. Subindo ó Xistral decidimos subir pola esttrada que leva
ó cumio só nos queda un desnivel dun 60 mt. pero estamos
cansos. No cumio hai un repetidor de la TVG. Carlos o controlador de quenda
míranos, o principio, con receo, despois de invitarnos a unhas coca
colas explícanos que en oito anos que leva no posto veu subir
a xente en catro ou cinco ocasións, pois o clima na zona é
un desastre, el explícanos o da conformación atmosférica
na zona e acúcianos a baixar pois sobre as 6 da tarde as nubes vólvense
asentar, ten razón pois baixando e antes de inicia-la subida ó
4º control Leboreiro 915 m. Xa non se ve o Xistral andamos rápido
para que non nos colla a néboa no cumio deste monte o vento ensáñase
con nós, tombámonos para facer unhas fotos á nosa
esquerda Viveirón ó Norte e a o lonxe a ría de Viveiro
deixase ver. Baixamos deixándonos guiar polo GPS. Gran invento este,
a verdade que nos guiou todo o camiño, méteslle as cordeadas
e zas para alí ou alá, en fin bo invento. Pola noite
ceamos en Vivieron, espléndidos, se ides non vos esquezades de dicir
que sodes montañeiros fan prezo especial. A Joel volveron invitarlle.
Ímonos durmir hai lúa chea, penso durmir coma un rei, ja
ás tres da mañá temos que ir durmir ó
coche, o vento rompeu os enganches da tenda e bótasenos enriba.
O domingo invítannos a almorzar, á vaca, que a vez anterior
presenciamos en vivo un parto por cesárea, non se lle nota a marca
o peliño llo tapa e o xato está ben naceu cunha eiva nas
patas pois non podía pó-los pezuños rectos, non o
operaron, puxéronlle uns tiros de correa e recuperouse case
do todo.
Saímos cara á praia das Catedrais visitámo-las
pasando un día tranquilo e volvemos a casa, pasamos unha magnífica
fin de semana.
Pedro
.
SECCIÓN SENDEIROS
2ª ETAPA TRANSOURENSÁN (G.R. 56)
Parada do Sil Montederramo
Domingo, 7 Outubro do 2001
Moita choiva, pero tamén moito ánimo durante esta etapa
do GR 56. Despois dun bo madrugón chegamos os 20 participantes a
Parada de Sil. Seguímo-lo Río asa a aldea de Bouzas, onde
comezamos subir por un sendeiro que zigzagueaba entre as conduccións
de auga da central eléctrica e encontrándonos en cada
revolta do sendeiro un cazador á espera dunha presa, alcanzámo-la
aldea de Forcas, onde no atrio da súa igrexa puidémonos abeirar
da choiva e comer. Seguímo-lo sendeiro, atravesámo-la ponte
de Couceliñas e internámonos nun bosque de matos onde se
perdían as marcas, conseguimos encontrar camiño, con non
poucos esforzos e enderezámo-lo rumbo. Atravesando a estrada a Castrocaldelas,
e saltando prados (con rabaños de vacas un pouco neuróticas)
comeza un diluvio, ¡cando só quedan 3 Km. para Montederramo!.
a auga empápanos por tódolos lados, ante a imposibilidade
de seguir chamamos ó Autobús e sorpresa Antonio C. y Señora
tamén están pola zona, así que salvados, rescátannos
cando estamos a punto de sucumbir afogados polo diluvio que nos cae enriba.
Unha vez en Montederramo utilizámo-los claustros do mosteiro cisterciense
coma vestiario improvisado, un par de cafés ben quentes no bar da
aldea e coma novos.
M.C.
Fraga da Marronda
30-31 de Setembro
10 participantes, bo tempo e magníficas paisaxes, que máis
se pode pedir. Volvemos aloxarnos no refuxio de peregrinos de Cadavo-Celeiros,
que podemos catalogar como de 5 estrelas polas súas boas instalacións
e o trato do garda, o Sr. Leandro.
Nesta saída estaban planeadas dúas rutas, as que intentamos
realizar no último campamento de inverno.
A primeira, que levamos a cabo o Sábado 30 levounos de Cadavo
entre fragas ata Fonteo e polo Eo outra vez a Cadavo, hai que recordar
que o pasado inverno nesta mesma ruta as choivas impedírannos
acabar.
A segunda ruta, o domingo 31, comezou en Fonteo e atravesando a Fraga
da Marronda, terminou en Martín. Neste tramo do GR1 houbo que esquivar
unha batida de cazadores, tan abundantes nesta época. Ó chegar
a Martín encontrámonos co alcalde do Cadavo, o que nos ensinou
a recente restauración da igrexa de dita aldea, despois dunha amistosa
charla invitounos a regresar unha vez máis por estas terras.
M.C.
NOTA
O club quere recordar ós participantes das actividades a necesidade
de actuar con responsabilidade, non cometendo imprudencias que poidan empapar
unha boa saída ó monte. En particular recoméndase
encarecidamente segui-las indicacións dos responsables da saída
cando se trate de actividades guiadas. Gracias pola vosa colaboración
e sigamos gozando do monte.
A MUDANZA A FIXERON OS SOCIOS
ESPELEOSECCIÓN
ESPÉLEO-ACTIVIDADES
¡Lástima! Acabaron as tardes de Picoña. Fixémo-la despedida, ate o vindeiro verán, durmindo (a maioría estiveron a contos) ó pairo e observando a posición do Carro na súa rotación ó abri-los ollos, de cando en vez, nun insomnio forzado. Este ano a afluencia foi importante, pois anda a media por doce persoas día facendo prácticas. Uns perfeccionaron, outros aprenderon, outros probaron e non volveron, outros quedaron enganchados e outros pasáronno ben e todos, todos, pasámolo moi ben.
ESPÉLEO-CAMPAMENTO SOCIAL
Foi un acerto cambia-la data do espéleo-campamento social (estaba para xuño), celebrámolo ó 29-30 de setembro. Tiñamos idea de ir a Cobas. Por unha información privilexiada o día antes cambiámo-lo sitio e fomos a Mondoñedo, á Cova do Rei Cintolo, tan traída e levada ultimamente pola teima de facela turística. Dicimos información privilexiada porque de non ser por ela chegariamos a Cobas e teriamos que durmir no apeadeiro ou buscárno-la vida porque había un curso da E.G.E. no refuxio, ¡e nós sen enterarnos! Din que mandaron carta. A nós, á sección, non nos chegou. En Mondoñedo, chegamos ó refuxio, cruzando os dedos para que non estivera ocupado, pero si estaba ocupado, neste caso podiamos coordinarnos perfectamente porque había oito persoas do E.C.A. e cabiamos ben. Xa no mediodía do sábado, cando chegamos, organizámo-los grupos e a actividade, decidindo despois de xantar ir a Cintolo e Lobos e outro grupo quedaría no refuxio facendo prácticas para o que se montaron cordas na viga, pois non había cascos para todos.
ESPELEO-NOVAS
17-18 Novembro, Xornadas Espeleolóxicas da E.G.E., posiblemente
en Mondoñedo.
24-25 Novembro, A nosa actividade de Club que máis se acerca
ó estudio non deportivo, non temos claro se será Bio-Xeo-espeleoloxía
ou Bio-Topo-espeleoloxía, por mor do invitado, xeólogo, que
aínda non nos contestou.
6-9 Decembro, Ide motivando esas neuronas, na ponte de decembro, non
imos saír lonxe, imos traballar onde xa tiñamos que ter acabado.
Iremos para Cobas, e alí, topografar por fin Rafavei, prospecciona-la
zona que falta e explora-las covas que encontremos, que algunha aparecerá.
SECCIÓN INFANTIL XUVENIL
TREVINCA
Refugio de Ponte
Saída: Sábado 24 ás 9:30
Chegada: Domingo 25 ás 20:00
Lugar: Novo local social: CAMELIAS, 78 oficina K
Despois do campamento rexional, e para despedi-lo ano imos a Trevinca
onde ía tempo que non nos deixabamos ver. Sairemos o sábado
desde o NOVO LOCAL SOCIAL, que moitos de vós inda non coñecedes,
e dirixirémonos ó refuxio da federación na vila de
Ponte. O domingo faremos unha marchiña como é habitual
e despois de comer volveremos a Vigo para chegar ó NOVO LOCAL SOCIAL.
Hai prazas limitadas. Non faltedes, non faltedes, non faltedes, non faltedes,
non faltedes, non faltedes, non faltedes, non faltedes, non faltedes, non
faltedes, non faltedes, non faltedes, non faltedes...
BREVES
Seminario sobre seguridade en Montaña
Este seminario celebrarase do 22 ó 25 de novembro en Benasque,
no Centro de Formación e Tecnificación de Deportes de Montaña.
Organizado pola F.E.D.M.E. e E.E.A.M.
Reunión Expedición 60 Aniversario
O próximo venres 30 de novembro terá lugar unha reunión
de toma de contacto para aqueles interesados na expedición a Bolivia
para o ano que vén.
Rocódromo das Travesas
Por fin vaise inaugurar este rocódromo, que leva feito varios
meses. Está previsto que sexa o día 17 de este mes.
Carmen
Damos a benvida a Carmen que xa está de volta - polo momento
- da súa aventura con Médicos sen Fronteiras en Angola.
AXENDA
ACTOS SOCIAIS DOS VENRES
9 Novembro Xerminación e plantación de sementes de árbores. Charla. Por Quique García. No Club ás 20.30 h.
16 Novembro O Tíbet, a súa cultura e situación actual. Charla. Por Martín García (Shambala). No Club ás 20:30 h.
23 Novembro Cinco cranios no Ecuador. Proxección de diapositivas. Polos participantes da expedición Levada 2001. No Club ás 20:30 h.
30 Novembro Picos de Europa, por Enrique (video) e Pedro (diapos).
No Club ás 20:30 h.
O salón social do club o venres 26 de outubro durante a charla
do colectivo LEGAIS. Faláronnos da importancia de asociarse e do
moito traballo que queda por facer para a normalización e tolerancia
no país no que vivimos
VINDEIRAS ACTIVIDADES
NOVEMBRO
10-11 Montaña. Marcha Outono. Portugal, Serra da
Peneda-Gerês.
11 Bici de montaña. Río Caldo. Xurés
17-18 Magosto social.
17-18 Espeleoloxía. Xornadas Espeleolóxicas da
E.G.E. Mondoñedo
18 Sendeirismo. Sendeiro de San Antoniño de Toques
24-25 Infantil-Xuvenil. Trevinca.
24-25 Espeleoloxía. Bio-espeleoloxía
25 Sendeirismo. Sendeiro da Saleta. Silleda.
DECEMBRO
2 Sendeirismo. PR-G 71 Ruta Pombar-Rebordondo.
6-9 Montaña. Pirineo oriental. Zuriza.
6-9 Espeleoloxía. Topografiado de Rafavei. Cobas
9 Sendeirismo. PR-G 25 Foxo do Lobo.
14 Festa fin de temporada e inauguración do Novo Local