Este ano imos ó Val dAran. A saída será o venres 2 de agosto ás 24 h e a volta a faremos o sábado 10 de agosto. O cámping (pendente de confirmar) é o Camping Yerla d'Arties, con prezos de 4,10 € persoa/tenda. Entre as actividades teremos:
Extraordinario recorrido de alta montaña, visitando algúns dos grandes lagos pirenaicos.
Bucólico paseo pola beira do río Garona.
Extraordinario recorrido polos circos glaciares de Saboredo e Colomers, na zona de maior densidade de lagos (estanys) de todo o pirineo.
Ruta do románico aranés.
O Tuc D'Arenyo atópase estratexicamente situado no centro da Val D'Aran, polo que dende o seu cume gozaremos dunha extraordinaria circular de toda a zona.
Ruta do Haut Aran, O principal atractivo desta xornada está no coñecemento do pla de Beret, có santuario de Montgarri e o nacemento dos ríos Garona e Noguera Pallaresa.
Ademais das seguintes propostas para os montañeiros máis experimentados: Besiberri Nord, Montardo dAran e travesía de gran fondo.
 
 

Para esta VIII edición, Montañeiros Celtas decidiu para esta actividade continuar co a filosofía de facela nun sitio novo onde nunca se fixera un descenso. Decidimos desenvolver a actividade no río Cenza afluente do Conso, no tramo comprendido entre Azud do Cenza Medio e Vilariño de Conso. Comprende un tramo do río de fácil acceso e tamén de fácil saída. O percorrido esta calculado para cinco horas en condicións normais, e con un grado de dificultade alto.
As inscricións faranse con 5 días de antelación. Para inscribirse é necesario estar en posesión da licencia federativa. O numero máximo de participantes será de 25 por riguroso orden de inscripción.
As 17 h do sábado terá lugar a recepción dos participantes en Vilariño de Conso na area recreativa e praia fluvial que hai o lado do Pavillón Deportivo. Para os que cheguen o sábado terán a súa disposición o Pavillón para poder pernoctar. As 9 h do domingo comezará o descenso propiamente dito e as 14:30 h teremos a comida de fraternidade.
 
 

TERTULIA

A do mes de Maio ¿Como  facer Vigo máis habitable?, atrasouse ata o día 23, e polo tanto na data de preparación do boletín non contamos coas conclusión. Tampouco está decidido o tema da Tertulia de xuño, que se desenvolverá o día 6 de xuño ás 21 h., co tema se acorda na tertulia de Maio.

CONCIENCIACIÓN PROBLEMAS ECOLÓXICOS

Realizarase o 23 de xuño Domingo  nela guiados por Maruxa, colaboradora deste Club e responsable dunha asesoría medioambiental, recorrerémo-lo camiño entre Matamá e A Garrida, cuns 15 km, que requirirán un certo grao de forma física, detallando sobre o terreo problemas ambientais localizados e tamén xerais. Algúns deles serán : Antiga incineradora, Complexo industrial Coruxo, Edificio de Toralla, Canteira en proceso de selado, Vertedoiro del Zondal, Multiusos de Vigo. Iremos en Autobús ata Matamá e regresaremos dende A Garrida tamén en transporte público, para unha maior concienciación ecolóxica.
Se pensades participar, anotádevos con tempo pois teremos limitación de prazas, tan só 20.
CONCURSO LITERARIO

Durante os primeiros quince días do mes de xuño recolleranse os traballos do concurso literario, as súas bases figuran no boletín de Abril. Deberán ser entregados en Secretaría co formato que se describe nas bases. Dende este espacio invitámosvos a participar a tódolos membros do Club con alma de escritor, ben en poesía ou en prosa. Os premios serán modestos pero  brindarédesnos grandes cousas como o ano pasado, gracias.

ESPACIO PARA REVISTAS  E
FOLLETOS CULTURAIS

Decidimos pór unha mesa debaixo do taboleiro de anuncios. A idea é que tódolos que teñades revistas culturais e ecolóxicas actualizadas ou información de trípticos, folletos, etc sobre actividades de cultura e ecolóxicas, podades e podamos deixalas alí para que calquera socio do noso club poda consultalas in situ sen levalas para casa. Gracias pola vosa colaboración.
 

Vilanova de Cerveira (Portugal)   21 de abril de 2002

Importante: A partir de agora, cobrarase o prezo de non socio a tódalas persoas que se anoten nunha actividade nos dous últimos días habilitados para elo.

ACTIVIDADES:
Domingo 4 Agosto: Travesía dos grandes lagos.
Saída do cámping ás 7 h. en bus ata a boca S. do túnel
Dende o Hospital de Viella (1600), marcas do GR-11, ata o desvío a Estany Redo e dende este lago volver ás marcas do GR-11 no port de Rius (2340) (3h.), bordear este lago e a altura do seu desaugue abandona-las marcas para ascender ó S. ata o estany Tort e collada de Mar (2502) (2h./5h.), agora xa o descenso é seguido por estany de Mar e Restanca; onde volvemos encontrar as marcas do GR-11; ata o cámping (4h./9h.). DESNIVEIS: +1000  -1500m. DIFICULTADE: media - alta
Extraordinario recorrido de alta montaña, visitando algúns dos grandes lagos pirenaicos: Mar (35,8 Ha.), Tort (30,5 Ha.), Redo (25,2 Ha.) e Rius (21,7 Ha.), o Mar ademais alcanza unha lonxitude de 1140 m. e unha profundidade de 110 m.

Luns 5: Ruta do Baix Garona.
Saída do cámping en bus ás 8 h. ata Bossost (710)
Cruza-lo Garona e buscar as marcas do GR-211 que nos conducirán pola beira do río ata Les (631) (1h.), aquí efectuaremos a parada do café con leite, antes de seguir ata Pontaut (600) (1 h./ 2 h.), dende aquí o GR inicia o ascenso ata Canejan (906) (1 h./ 3 h.). A continuación, por sendeiro sen sinalar, levaranos ata a fronteira francesa que alcanzaremos polo Pas de Trentenada (1400) (1,5 h./4,5 h.) onde prevemos efectua-lo xantar para, despois da merecida sesta descender polo bosque de Month Caubeth ata Fos (544) (2h./6,5 h.) onde nos esperara o bus para o regreso ás 18 h. DESNIVEIS: +700 -1000. DIFICULTADE: Baixa.
Bucólico paseo pola beira do río Garona, subidiña para abri-lo apetito e visita de Fos, principio e final de etapa do GR-10 Traversee des Pirinees, senda pirenaica francesa paralela ó noso GR-11.

Martes 6: Ruta das cuncas glaciares.
Saída do cámping ás 7h. en bus ata o Port da Bonaigua (2050).
Iniciámo-la marcha descendendo en dirección S. ata a Ribera de Ruda (1800) a encontra-las marcas do GR 211-4 que nos conducirán ó través do circo glaciar de Saboredo ata o Port de Ratera de Colomers (2572) (3,5 h.) a partir de aquí, polo GR-11 que nos conducirá en rápido descenso ata o circo glaciar de Colomers e despois ata o Pont de Ressec sobre o Valle de Arties (3,5 h./7 h.), dende aquí ata o cámping quédanos segui-la pista de Vallarties (1,5 h./ 8,5 h.). DESNIVEIS: +1100 -1800. DIFICULTADE: MEDIA- ALTA
Extraordinario recorrido polos circos glaciares de Saboredo e Colomers, na zona de maior densidade de lagos (estanys) de todo o pirineo.

Mércores 7, Ruta do románico aranés.
Saída do cámping ás 9 h., a cruzar o Garona para encontrar as marcas do GR 211, que nos serviran de guía toda a xornada, descendendo polas beira do río e visitando os lugares máis representativos do románico aranés. Escunhau, Betren e Viella (1,5 h.) será  a nosa primeira etapa antes de toma-lo xantar, seguiremos por Vilac, Aubert, Begos e Vilamos ( 3,5 h./ 5 h.) onde prevemos efectua-lo xantar, visita opcional a Sant Miqueu e chegada a Arres, onde deixaremos as marcas do GR 211 para descender directamente a Bossost (2,5 h./ 7,5 h.) polo mellor camiño, o bus devolveranos ó cámping a partir das 18 h. DESNIVEL: +100 -500. DIFICULTADE: Baixa.

Xoves 8, PR-112.
Trátase dun circuíto circular, con saída e chegada ó propio cámping. Volveremos cruza-lo Garona a buscar o GR 211 que seguiremos augas arriba pasando por Gessa e Unha, ata Bagerge (1419) (1,5 h.), aquí iníciase o PR 112; marcas brancas e amarelas; que van remontando a Val D'Unhola ata o Coret de Varrados (2050) (3h./4,5h.), cambiamos de vertente e continuámo-lo ascenso ata o cume do Tuc D'Arenyo (2522) (2h./6,5 h.), inmediatamente se inicia o vertixinoso descenso ata Gessa (1232) (2,5h./9h.) moi preto do cámping.  DESNIVEL: +- 1450. DIFICULTADE: DURA
O Tuc D'Arenyo atópase estratexicamente situado no centro da Val D'Aran, polo que dende o seu cume gozaremos dunha extraordinaria circular de toda a zona.

Venres 9, Ruta do Haut Aran.
Saída en bus ás 8 h. ata o aparcadoiro de Pla de Beret (1845), ó que regresaremos despois de visita-lo santuario de Montgarri (3h.) ida e volta polo GR 2111.
Empezarémo-lo regreso ó cámping cruzando o Pla de Beret ata o aparcadoiro de Orri e visita ó Horat deth Bo, cova formada polo leito do río Malo a 5 minutos do aparcadoiro, o recomendable é segui-lo sendeiro ata a boca superior e descender polo leito, non é necesaria a lanterna, a única dificultade é que hai que ir progresando por enriba dos croios coidando de non darse un remolllón nos 250 m. de recorrido, en parte a ceo aberto. Una vez voltos a Orri (1860)(1,5 h./4,5 h.) descendemos polas pistas de esquí ata Baqueira e río Ruda (1400) (1h./5,5 H.) e polo GR 211,4 ata o cámping (1h./6,5h.). DESNIVEL: -700 M. DIFICULTADE: BAIXA.
O principal atractivo desta xornada está no coñecemento do pla de Beret, có santuario de Montgarri e o nacemento dos ríos Garona e Noguera Pallaresa.

PROPOSTAS DE DIFICULTADE
BESIBERRI NORD (3015)
DESNIVEIS: +1400 -2000. TEMPOS: de 10 a 12 h. DIFICULTADE: Pode ser necesario o uso da corda, se non se acerta coa vía axeitada, anque é bastante evidente. O Besiberri Nord é un clásico do pireneísmo... UN PICO CON MOITO GANCHO.

MONTARDO D'ARAN (2833)
DESNIVEL: +- 1700. DIFICULTADE: Debido ó desnivel e ó horario; non se fará en menos de 10 h.; será unha actividade de gran dureza. O Montardo é a montaña aranesa por excelencia, a súa visión dende Arties é espectacular.

TRAVESÍA DE GRAN FONDO
1er día: sendeiro GR 211-4, refuxio e circo glaciar de Saboredo (2310). 2do día: Port de Ratera (2572), refuxio de Colomers (2130), Coll de Caldes (2570), estany Negre (2215). 3er día: Ascensión ó Montardo (2833) e descenso ó cámping pola Restanca. UNHA EXCEPCIONAL TRAVESÍA QUE NON ESQUECERÁS.

Montañas de Galicia: Fontefrías-Serra do Xurés
Domingo 12 de Maio

Sendeiro dos Megálitos
Domingo 4 de maio

Unha ducia internámonos polos bosques e prados de Toques, preto de Melide. Tomando varios sendeiros marcados unímo-los puntos máis pintorescos deste Concello. Saíndo da casa consistorial ascendemos por carballeiras ata o Cenobio de San Antolín, onde na súa capela prerrománica volvemos encontrar, como en anteriores ocasións, co párroco, pois abre as portas para misa de 11. Despois de asinar no libro de visitas e dar unha volta polas ruínas do mosteiro, as que atravesa un regato que no seu día moveu a engrenaxe dunha fábrica de cravos, dirixímonos polo Sendeiro das Grañas para enlazar coa ruta dos megálitos.
Tendo ó fondo o pico do Pilar, máximo cume da provincia da Coruña con algo máis de 700m, alcanzámo-lo primeiro fito da senda dos Megálitos: Penamoura, formación rochosa que domina as serras e prados circundantes, onde descansamos e comemos. O día despexado pero ventoso, acompaña a unha curta sesta. Continuámo-lo noso camiño, atopándonos coa Mámoa de Forno dos Mouros, a que inda apuntalada con Vigas, está en relativo bo estado de conservación. Podemos comprobar que a entrada deste monumento megalítico está orientada ó este: cara ó nacemento do Sol.
Como non todo vai ser vellas paisaxes, facemos unha breve escala en Brañas, onde na Taberna da Vila refrescámonos e xogamos unha rifada partida ó Futbolín, neste punto o grupo se separa, catro dos participantes regresan ós coches por estrada e o resto seguimos.
Abandonámo-lo camiño marcado e encamiñá-monos ás Fervenzas de Brañas, unha das máis espectaculares da provincia, onde o muíño empoleirado nun dos laterais da mesma realza o espectáculo de auga.
Para acaba-lo día ascendemos ata o Castro de Brañas, cuberto pola maleza, nas seus proximidades estupendos cabalos e algún poldro forraxean tranquilamen-te ó Sol.
Parada en Melide para un refrixerio.  De regreso a Vigo, podemos contemplar ós Peregrinos que se encamiñan a Santiago pola estrada.

SENDEIROS XUÑO-XULLO 2002
Domingo 9 de Xuño. Gr94. Rural De Galicia. Etapa III: Cotobade-Cuntis. Autobús. Saída Club Montañeiros Celtas. 8:30 Horas.
Fin De Semana 22-23 De Xuño. Gr50. Ruta Do Medievo. Etapa IV. Travesía Pola Serra da Capelada (San Andrés de Teixido). Autobús. Saída Club Montañeiros Celtas. Sábado 22 Ás 7:00 Horas.
Domingo 7 de Xullo. PR Sendeiro Celta-Vilanova de Cerveira. Coche Particular. Saída Club Montañeiros Celtas. 9:00 Horas.
Fin de Semana 13-14 de Xullo. Campamento de Verán: Camariñas, Pr G38. Costa da Morte.
Domingo 21  de Xullo. Gr94. Rural de Galicia. Etapa IV. Autobús. Saída Club Montañeiros Celtas. 8:30 Horas.
 

Campamento galego de espéleo

Celebrado os pasados 20-21 de abril, alá fomos 17 membros do club ó Courel. Dedicado ó medioambiente, exploramos e limpamos (afortunadamente non houbo que retirar lixo) as cavidades "Carrelo do Asno" e "Riba do Carrelo". Completouse con prospección nun fermoso afloramento na outra beira do Lor. Nada,... por agora. Volveremos.
Xa o domingo, despois de recoller, xornada matinal na escola de Seoane de medioambiente e coa clausura, sorteo de material. Abundantes premios (case todos levamos algo) que algúns socios (Pepe, Pablo, Daniel e Emilio) doaron ó Club, entre aplausos. Gracias.
Pola tarde, despois de xantar, visita á Veiga de Brañas, para localizar zona de acampada e falar cos veciños, xa que organizámo-lo VI Campamento Galego Infantil- Xuvenil de Espeleoloxía.

VI Campamento Galego Infantil-Xuvenil de Espeleoloxía

Campamento Galego, actividade do calendario da Federación, organizado por Club Montañeiros Celtas que podemos considerar un éxito total. Espeleo-topografico-prostectivo-culinario.
¡Parece unha palabrota! Mais non.
Fomos moitos, e eso que algúns quedaron na casa por mor dos virus e a idade (estamos propoñendo unha licencia alevín). Igual que lles pasou a outro club.
18 rapaces en total. E 16 acompañantes. Moitos rapaces era a primeira vez que entraban nunha cova. ¡E encantoulles!
O venres, cunha chuvia persistente chegamos a Brañas da Serra, pois, afortunadamente, tivemos que cambia-la zona de acampada. Afortunadamente porque o lugar era fermosísimo, cun forno tradicional onde instala-la cociña, unha eira preciosa onde estar e xantar,... parecían unhas xornadas espeleoetnográficas. Instalación de tendas, xantar e... de covas.
Un grupo iniciado, cos seus acompañantes, foi facer prácticas de topografía, en Cortiñas. O outro grupo, explicacións de como funciona a iluminación e, impacientes, a explorar Casares. Como se formou, como son as formacións,...
Cea con charla dos "carrozas" (Conchi apareceu cunha cafeteira, que case ten que poñer babeiro polas loubanzas) e bla, bla, bla, e máis bla dos "espeleologuiños".
O sábado pola mañá, logo do opíparo almorzo, organizáronse tres grupos para explorar, sen molestarse, a cova de Cortiñas, que polas súas características, é moi adecuada para traballar varios grupos. Outro grupo, máis de acompañantes, foi localiza-la de O Mazuco. E outros, coa loxística, en Pedrafita.
Xantar conxunto nun prado.
Coa sobremesa, a organización agasallou a todos cun cordino para iniciarse uns e repasar outros... os nós máis básicos: oito, oito con orellas, de vaca,...
Pola tarde, exploración, por grupos, na cova de Súas Faias.
Noite: Volta ó Campamento onde a organización xa tiña preparados uns excelentes (senón preguntar a José Higinio, ou ós máis cativos) espaguetis con carne, salsa de tomate e queixo raiado que tiraban para atrás e, de paso, cargábanse pilas para a velada e o día seguinte. ¡¡Que man ten Conchi!!
O domingo, almorzo reparador, lento, silencioso (xa se sabe, se falas moito pola noite, e dormes pouco, os movementos fanse máis lentos e o almorzo alóngase máis, o que afecta ás galletas, curruscos e magdalenas).
Aproveitando que o sol tamén quería participar do Campamento, recolléronse tódalas pertenzas e se deixaron a seca-las tendas (que serían recollidas durante os xogos polos acompañantes).
Houbo que adapta-los xogos ás características dos participantes, e, así, en vez das carreiras de orientación ou uso de equipo de vertical a organización optou pola realización de xogos populares galegos. Así, dentro dun ambiente de certa algarabía, os rapaces, e non rapaces, degustaron de "salta-la corda","carreiras de sacos", balón volea caseiro" e "pañueliño". Aproveitando que o sol "picaba" Club Montañeiros Celtas agasallou ós participantes cunhas viseiras de G.E.S. Celtas.
Algún iniciado e algún dos acompañantes aproveitaron para facer unha exploración da redescuberta Cova da Pena a escasos 60m do Campamento.¡Que se lle perdería a Pilar ás oito da mañá nese afloramento!
A mediodía para acompaña-las empanadas de atún e carne, outra vez Conchi coceu uns chourizos que co pan fresco estaban... para que contar. Ata sobrou postre.
Despois dunhas breves palabras de agradecemento, Club Montañeiros Celtas agasallou cunha camiseta co anagrama do Club a tódolos acompañantes.
Tamén se repartiron a participantes e acompañantes as revistas enviadas polas Federacións Española e Galega de Espeleoloxía.
 Por último procedeuse ó sorteo de material, no que tódolos participantes puideron levar a casa un lote de material de espeleoloxía.
Só resta sinalar, neste apartado, a colaboración desinteresada de casas comerciais (algunhas queren o anonimato) sen as que non sería posible a realización do VI Campamento Galego Infantil-Xuvenil de Espeleoloxía. A todos eles, de tódolos asistentes e de todo corazón, un millón de gracias.

Catálogo de Canóns de Galicia

Na zona de traballo do Sil, onde pernoctamos en Sta Cristina, traballamos no Gundrei e localizamos varios máis para traballar máis adiante. Acompañáronnos dous membros do Arcoia.
O domingo localizamos e estudiamos como instalar unha fervenza duns 40m nun afluente do Miño, por aquela zona. Voltaremos traballar na zona porque aquí será o Campamento Social de Descenso de Canóns. Vaite preparando. Precisas licencia, neopreno e ganas.
 

Saída ó Caurel

Saímos poucos a fin de semana do 11/12 de maio ó Caurel, con dous obxectivos: últimos preparativos do Campamento infantil-xuvenil e exploración de cavidades. O primeiro, o sábado, con xestións en Pedrafita, Veiga de Brañas e Brañas da Serra. Pernoctando en Liñares, baixamos á zona de Mostad para localizar e explora-la Sima do Manco e a Tara da Lastra.
Coas indicacións, a chuvia e a néboa, foinos imposible atopa-la primeira, mais mollámonos ben. Levounos toda a mañá. Xantar en Mostad. Localizamos e explorámo-la segunda cavidade. Moi bonita.
Pola tarde, aproveitando que deixara de chover e levantara a néboa (e un veciño indicounos onde estaba), voltamos a busca-la Sima do Manco. Subida longa por forte desnivel, e dimos con ela á primeira (os comentarios sobre as indicacións da localización da cova que aparecían na topografía non se poden escribir aquí) Como non había tempo, quedou para explorar noutra ocasión.

Espeleonovas

Seguimos a traballar no Catálogo de Canóns. ¡Ánimo!
Atención. Lembrades que algúns espeleólogos queriades proba-la escalada. Pois ben, fanse unhas xornadas de iniciación á escalada o domingo 16 de xuño. Xa sabedes: apuntarvos. Vémonos no Galiñeiro.
XIII Campamento de Descenso de Canóns, da Federación. Dúas novas: adiántase ó 22/23 de xuño e será no Xurés. Importante: se queres descende-los da zona portuguesa debes te-la licencia que te cubra Portugal.
29/30 xuño. Campamento Social infantil-xuvenil de Espeleoloxía.
6/7 xullo. Campamento Social de Canóns, na Riboira Sacrata. No Sil.
Nova importante, sempre por estas datas: ¡comezan "AS TARDES DE PICOÑA"!. Engraxa o engraxable e pon a ton a musculatura. Este ano vai ser duro. Os martes, dende xuño a setembro, ás tres da tarde sairemos con ganas.
 
 

Xa levamos 35 ¿cantos anos?  ¡35!  Da operación benxamín. E comeza este ano co incansable entusiasmo de tódolos rapaces repetidores, novos e monitores.
Outro ano e como non, a primeira viaxe ó monte Aloia. Para uns un fermoso sitio xa de sobra coñecido, para outros un espacio natural cunha casiña encantadora onde durmiremos e faremos das nosas e para David un amplo lugar que percorrer ó longo da súa historia.
Despois das pertinentes normas, e unha vez ordenado o espacio no que pasariamos a fin de semana, David convenceunos para ir pasear, pola muralla que circunvala o alto do monte. Era a primeira toma de contacto co medio, porque ó día seguinte, o domingo foi espectacular, ¿onde imos? Pois pola liña máis recta do mapa.
Se nas nosas habituais camiñadas, practicamos tojing o silving esta non ía quedar  laight  polo que decidimos practicar ese deporte de risco chamado musging e para practicalo é doado.  O lugar: unha forte pendente de  grandes  laxas de pedras , cheas dese elemento de cor verde, moi mollado e esvaradío. A nosa profesionalidade, fixo que os primeiro medos se converteran en risas e infatigables chegamos abaixo, e todos pensando na volta ¡por aí temos que subir!, non home non, daremos unha pequena volta de trinta e tantos quilómetros e atoparémo-lo refuxio.
Ninguén protestou, todo era valido con tal de non volver polo mesmo sitio.
¿E cando comemos? Estaba claro que abríusenos o apetito. Eran ás 11:30. Ás 12:00 ¿podemos comer xa?. Difícil é crer que a comida chegue de volta á casa. E como non unha paradiña para xantar, dende o cumio entrevíase ó lonxe, Tui envolto en néboa. O tempo non nos axudou moito a gozar da fin de semana, pero quedábannos moitas cousas que facer. Había que regresar ó refuxio. Aproveitámo-la tardiña para seguir gozando do día. Os monitores dixéronnos que habería que revisar as tendas para vindeira saída  ¿isto que é?  ¿que lea?, uns paos, unha tela, uns ferriños afiados e nun plis-plas  ¡ala! Unha casiña e con tellado ¡que pasada!. En tan pouco espacio e dinnos que  para durmir, caberiamos 4 ou 5 de nós, habería que velo. En Pigarzos á seguinte fin de semana.
Esta fin de semana deu de si tanto coma a encantadora casiña na que durmimos 50 rapaces e 10 monitores.
Camiño da Carballeira dos Prados en Pigarzos (Pontecaldelas) saímos de vigo ás 16:30. Nada máis chegar e o que xa sabiamos, pois montaxe de tendas ¡ostras! Unhas casiñas redondas con teito redondo. Repartíronse as tendas de tal xeito que tivemos sorte e tocounos durmir nunha delas. Metémo-las mochilas, estiramos os sacos e a merendar.
De inmediato concurso de cociña, sacamos das mochilas os ingredientes e fixemos o que puidemos. A verdade e que puidemos facer algo máis, polo menos algún de nós.
Non quedaba moita luz do día e despois das pertinentes fotos, cos doces resultados, recollemos e volta ás tendas, cear e inda que non era a noite de San Lourenzo, tivemos moita sorte e Juanjo ofreceunos unha visión de estrelas contándonos onde podiamos ver a Vía Láctea ou Leo, entre as moitas estrelas dun ceo inmensamente poboado delas. Despois de case quedar durmidos, recollémonos nas tendas e a soñar coas galaxias, e os buracos negros.
E que sorte tivemos, porque ás 6.30 h o ceo estaba tan cuberto que facía pensar que o día ía ser malo. Aguantou a nosa camiñada cara ó foxo do lobo, pero non vimos nin o foxo nin o lobo, e menos mal que non nos apartamos da pista de subida pois a néboa podíase cortar con garfo e coitelo.
Molladiños demos volta e abaixo, a beira do río as tendas estaban case secas, dubidamos de recollelas ou non e decidimos esperar que secaran un chisco máis, e como non, púxose a chover, tendo que facer prácticas  de recollida urxente.
Ó chegar a Vigo teriamos que estender o tendal ata o día seguinte.
Quedábanos a saída a Sanabria. Din que á terceira vai a vencida, pois levarémo-lo bronceador e por se acaso o
chuvasqueiro.

Este ano temos intención de realizar máis actividades subacuáticas, como podedes ver no calendario anual do Club, sendo unha das máis destacadas a recuperación do famoso Descenso con aletas do río Tea previsto para o 2 de xuño. Esta actividade foi organizada polo Club durante once anos, celebrándose por última vez en 1993. A normativa actual (data de 1997) regula as actividades recreativas e deportivas nos ríos que, como o Tea, teñen cotos de pesca, sendo necesaria autorización da Concellería de Medio Ambiente. Solicitado o correspeondente permiso ó Servicio Provincial de Medio Ambiente Natural, remítenos unha resposta desfavorable por estar en tempada de pesca, pero suxiren o cambio de datas, sendo posible realiza-la actividade a partires do 1 de setembro. Pero en Setembro o caudal do río é insuficiente. Sentimos non poder realizar esta actividade que tantos socios disfrutaron e que desexabamos volver facer.

Inmersión submarina na Ría de Vigo

A mañá do domingo 16 de xuño, os mergulladores do Club estamos convocados na praia de Limens para unha inmersión suaviña, xa que para moitos será a primeira da tempada e para algúns o retorno a unha actividade algo esquecida. É imprescindible estar en posesión de Títulación e da Licencia Federativa FEDAS (lembrar que está subvencionada polo Club si xa tedes outra: montaña, espeleoloxía ou esquí). Ide preparando o material: botella (o Club conta con 3 recentemente revisadas), regulador, chaleque, neopreno, plomos, aletas, gafas e tubo.

Xornada de Iniciación ó Mergullo

Na mesma data e no mesmo lugar que a inmersión submarina, pero pola tarde, desenvolveremos unha serie de actividades para aqueles compañeiros que teñan curiosidade por coñecer este medio, o mundo submarino. Non é un cursiño, simplemente pretendemos crear afición (ós que resulten máis interesados, deben facer un curso oficial para obte-los adecuados coñecementos e Titulación correspondentes) e soamente é preciso equipo lixeiro: neopreno, plomos, aletas, gafas e tubo.
Sechu

7 de xuño Un montañeiro en Gredos, proxección diapositivas,  por Antonio Jiménez. No Club ás 20:30

14 de xuño Clausura da XXXV Operación Benxamín. Entrega de Premios e agasallos. Proxección de diapositivas, pola Sección Infantil-Xuvenil. No Centro Cultural Caixanova, ás 20.00 h.

21 de xuño Alta Montaña, actividade invernal 2002: Trevinca, Peña Ubiña, Pireneos. Proxección de diapositivas, por Sechu. No Club ás 20.30 h

28 de xuño  Trekking no Lan-Thang. Proxección de diapositivas, por Fernando. No Club ás 20.30 h
 

  XUÑO
 
 8-9 Curso Escalada Alpina (E.G.A.M.)
 9 Rural de Galicia. GR. 94. Etapa III: Cotobade-Cuntis
 9 Bici de montaña. Península do Morrazo
 16 Xornada Iniciación Escalada. Galiñeiro
 16 Inmersión Submarina. Ría de Vigo: Liméns
 16 Xornada Iniciación Mergullo. Ría de Vigo: Liméns
 22-23 VIII Descenso de Barrancos (F.G.M. - C.M.Celtas)
 22-23 Ruta do Medievo GR. 50 Etapa IV: Serra da Capelada (San Andrés de Teixido)
 22-23 XIII Campamento Descenso de Canóns Galicia (F.G.E.). Xurés
 29-30 Campamento Infantil de Espeleoloxía
 30 Piragüismo: Ponte de Lima  Ponte da Barca
 30 Curso  Iniciación Barrancos (E.G.A.M.)

  XULLO
 
 6-7 Campamento Social de Canóns Galicia. Ribeira Sacra
 7 Sendeiro Celta. Vilanova de Cerveira
 7 Curso Iniciación Barrancos (E.G.A.M.)
 13-14 Campamento Verán. Camariñas. Actividade Subacuática e Sendeiro Pr G 38 Costa Da Morte
 
 

Para comunicarse có club, a dirección é m_celtas@yahoo.com.

Modifiquei esta páxina por última vez en Maio de 2002.