1,2,3,4,5......¡60! anos de Montañeiros Celtas. Toda unha Historia de amor polas montañas, o deporte, a natureza, a cultura e todo o que os relaciona.
Como membros do máis veterano e maior club de montañismo de Galicia, temos moitos motivos para estar orgullosos: "montañeiros celtas" levaron o pavillón de Galicia e Vigo a cumios dos cinco continentes, dende os xeados cumes de Grenlandia ata as altas cordilleiras de Nova Celandia, cun palmarés de primeiras expedicións españolas a montañas de Asia, África e América, ademais de primeiras escaladas nacionais nos diferentes macizos alpinos e escandinavos. Na última década destaca a chegada ó cumio do Everest, ascendido por unha muller, que converteuse na primeira española e terceira no mundo que o lograba sen osíxeno. Falamos de Chus Lago, quen iniciará o 15 de marzo un ciclo de oito conferencias co lema "A miña amiga a Montaña". Estas conferencias están organizadas polo Club dentro dos actos conmemorativos do 60 Aniversario e con motivo de se-lo Ano Internacional das Montañas, catro conferencias serán impartidas polos tamén recoñecidos socios: Chito, Cholo, Manuel González e José Manuel P. Prego, e outras  dúas por invitados de prestixio: Gonzalo Puerto e Ricardo Burriagán. A oitava conferencia está pendente de confirmar. No vindeiro boletín publicarémo-lo calendario detallado destas conferencias que ultima o compañeiro Fernando Fernández.
Como tódolos anos, celebraremos a tradicional Cea Aniversario. Xa que Montañeiros Celtas foi fundado un 2 de febreiro e este ano cadra en sábado, pareceunos o día idóneo para a Cea, considerándoa "Acto Inaugural do 60 Aniversario" onde se entregarán, como é tradición, medallas ós socios con 25 e 50 anos de antigüidade no Club.

Con 50 anos no Club:
 Manuel Núñez Estevez
 José González Rodríguez
 Francisco Comesaña Álvarez
 Bienvenido Sío Comesaña

 Con 25 años no Club:
 Benigno Iglesias Albuger
 María Fernanda Núñez Navarro
 Vicente García Grobas
 José Manuel Pérez Prego
 Ana María Alonso Martín
 José Manuel Lago Rey
 María Jesús Lago Rey

Esperamos vervos a todos  un ano máis posto que é unha ocasión especial de encontro.

Para o Menú tivemos en conta que o pasado ano tocou peixe polo que eliximos carne, esperamos que sexa do voso agrado:

TERTULIAS
Por diversas razóns a tertulia que estaba prevista para o mes de Decembro aprazouse ata o 3 de Xaneiro. O tema foi  A globalización.
Contamos cunha representación moi nova. Houbo xente extremista no sentido de que tódolos efectos da globalización lles parecían negativos, pero en xeral reinou a postura de ver aspectos positivos e negativos. A continuación escribo as conclusións principais:
Aspectos positivos:
A facilidade de intercambio de información fai que os homes sexan máis libres.
A concienciación ante os problemas globais, fai buscar solucións globalmente. Aparece una ética global que supera culturas e relixións.
Aspectos negativos:
Arrase de bastantes culturas  economías.
Destrucción ou superexplotación global dos recursos naturais e contaminación global.
A día de hoxe inda non nos reunimos na tertulia de Xaneiro que ten por tema : O medo nos deportes de risco.
O tema da tertulia de Febreiro está inda por determinar e será o Xoves 7

SAÍDA ORNITOLÓXICA
Esta saída será dirixida por unha experta ornitóloga Mónica coa colaboración de Baro, son dous excelentes biólogos e amantes da natureza.
Día: 10 de Febreiro.
Lugar: Desembocadura do Miño.
Saída: Posiblemente sobre as 10h. pero sen confirmar e en coches particulares.

CHARLAS
BOTIQUÍN DE MEDIA E BAIXA MONTAÑA
PROTECCIÓN DA VISTA NA MONTAÑA
Será o venres 15 de Febreiro ás 20:30h. e será impartida por María  Villaverde, experta montañeira e farmacéutica . Cremos será una charla de interese para un bo número de persoas e preténdese facela sinxela e accesible. Complementarase con outra pequena de protección dos ollos na montaña a cargo de Ramón García, óptico experimentado e esquiador.

DÍA DAS PANXOLIÑAS
A participación de 2 grupos deu alegría e bo ánimo no día da festa de inauguración do novo local. Cantáronse panxoliñas tradicionais e modernas, e anque as cordas vocais non respondían en todos ó mesmo nivel, agradecémo-la participación sen distincións, e animamos a pór o listón cada ano máis alto.
Só nos resta felicitarvos o novo ano, pois escribo estas liñas a principios de Xaneiro, co desexo de que a harmonía e a cultura poidan incrementarse, co pequeno graíño de arena que aportamos todos, o que alomenos intentamos aportar co noso pobre coñecemento.
Martín (Shambala)
 
 

• Damos a benvida na Xunta Directiva do Club a Andrea Rosario no cargo de Secretaria. Cremos que o vai face moi ben e esperamos que aprobe tódalas materias.
• Nota sobre as licencias infantís-xuvenís: Os rapaces que teñan previsto participar na Operación Benxamín ou en outras actividades de escalada teñen que escoller unha licencia que cubra a escalada.
• Necesitamos xente para sinala-los sendeiros do club, empezando polo PR-G 1. Se estás interesado/a en colaborar asiste á reunion o vernes 25 de xaneiro ás 21:30 h.

ACUEDUCTO DA CONSTITUCIÓN EN ZURIZA

Saímos de Vigo á hora sinalada con Alberto como xefe de expedición. Da viaxe non vou dicir nada xa que foi coma sempre. Paramos en Sanabria nas Señoritas e en Burgos puidemos lembrar o sutil aroma do lugar onde nos soen parar os buseiros.
Chegamos a Zuriza sobre as 9 a.m. e ía un frío que pelaba. Montaxe de tendas e primeira actividade para estirar os músculos. Subimos ata o collado de Petraficha onde o bo amigo Martín botou as súas oracións o vento para que os deuses nos protexeran nas nosas aventuras. Os máis aguerridos atrevéronse a subir ata o Trixipeta a pesares de que a noite se nos botaba enriba. A volta foi polo mesmo camiño cunha pequena variante que nos obrigou a facer unha arriscada destrepada en mixto que nin as cabras o farían tan ben. Cando chegamos ó refuxio de Taxera xa era noite pechada e como é habitual o frontal non estaba na mochila (hai que ter moito coidado porque na montaña a lei de Murphy e o principio da entropía cúmprense sempre). Sen máis novidade chegamos ó cámping pero a min tocoume ducharme con auga máis ben fría e para votarlle valor púxenme a cantar o Anello do Nivelungo. Frío por fóra, frío por dentro e o corpo polo medio.
A actividade do segundo día metía un pouco de medo así que só os mais bravos atrevéronse con ela. Un pouco antes do túnel de Larrau (a neve non lle permitía subir máis ó bus) só sete persoas baixamos do bus e comezamos a ascensión o Orhi subindo pola estrada cun metro de neve ata chegar ó porto onde saudamos a dous membros da benemérita que tamén tiñan pensado subir ó Orhi. O día foi espléndido e a ascensión moi bonita, ía pouco vento, cousa que non é moi habitual pois soe ir bastante, pero moito frío. Cando chegamos ó cumio, fomos os primeiros do día, a vista era espléndida, o ceo limpiño e o Midi destacaba entre tódolos cumios. Cando levabamos cinco minutos no cumio apareceu un Iñaki en pantalón curto e mangas de camisa, tiña a pel dos brazos e das pernas coma as dos capóns de Vilalba, e a penas tivemos tempo de falar xa que lle entrou moita presa por baixar, era de Bilbao. Nós seguimos coa nosa ruta e fixemos o descenso seguindo a cristería ata chegar ó río Ibarrondoa onde comezaron os nosos problemas de situación. ¿Estabamos en España ou en Francia?. Percorremos pistas e devesas sen albiscar o noso camiño. A noitiña xa se sentía e eu empecei a lembrar unha noite na Serra Amarela pero afortunadamente un dos meus compañeiros sacou do seu peto un aparello que conecta cos satélites e dáno-lo punto exacto onde un se atopa (eu xa tiña visto estes aparellos pero nunca crin neles) e a partires deste momento todo foi moi sinxelo fomos parar ó punto exacto onde tiñamos que estar e cando tiñamos dúbidas o aparello sacábanos delas. Xa de noite chegamos á fábrica de Orbaizata onde nos esperaba o bus e os nosos compañeiros, un pouco preocupados. Chegamos dúas horas atrasados sobre o horario previsto. Esa noite tiven sorte tocoume auga quente.
A actividade do ultimo día comeceina almorzando co meu amigo Gaspar un par de ovos fritidos con chourizo e viño da terra, facía falta xa que a marcha de aproximación a Mesa pode esgotar a calquera (saímos as 8 a.m. e volvemos ás 8 p.m.). O tempo foi magnifico, moito frío e moito sol. Saímos do refuxio de Linza e despois de pisar moita neve chegamos ó pé da Mesa onde tivemos que usar os crampóns, a subida é un pouco empinada pero faixe ben se estás en boa forma, se non é así podes sufrir agarrotamentos e cambras coma nos pasou a nós, a idade non perdoa. Cando baixamos da mesa o bo de Luís estábanos a esperar xa que os demais liscaran. Como soe suceder botóusenos a note enriba e non tiñamos frontal así que fomos apalpando o camiño ata que ollamos as luces do refuxio, ¡alegría, alegría! Os compañeiros estábannos a esperar e uns Iñakis moi amables baixáronnos ata o cámping (as veces estar entre os de máis idade ten as súas vantaxes). Para remata-lo día tiven sorte, tocoume auga quente e ceamos moi ben.
Hai que sinalar que se fixeron outras activades como a subida ó Ezcaurre e algún tramo do GR-11 polo que o listado de Heroes - Heroínas foi moi avultado.
En resumidas contas ía tempo que non o pasaba tan ben nunha saída pero saín cun ano menos e volvín cun ano máis.
O domingo volta a casa.
Celtis Lupus

.

FINAL DO GR 56. TRANSOURENSÁN. ETAPA IV
CHANDREXA-MANZANEDA, 16/12/2001

Etapa moi montañeira, con desnivel e frío intenso. Saída de Chandrexa ás 9:30, despois de pernoctar parte do grupo en Casa de Gerardo. Somos máis dunha trintena subindo cara a Manzaneda. Alcanzámo-la aldea de As Forcadas despois de atravesar pistas e carreiros empedrados, sempre subindo, pois temos que librar 800 m de desnivel. Ó chegar o Sixtil empezamos a chairear, vendo ó lonxe Cabeza de Manzaneda (1700 m), o vértice que ascendemos ás 14:00, dando por finalizado o Gran Recorrido que iniciamos no mosteiro de San Estevo outro despexado día como este pero non tan frío, no mes de Setembro. Despois de contempla-las vistas que se nos regalan dispoñémonos a comer na Estación Invernal. Retornamos a Chandrexa monte a través e caemos na vila de Parafita e de aí por un PR marcado por Gerardo ó noso punto de partida, xusto antes do anoitecer.
Con esta última etapa cerramos este GR que durante esta temporada de outono levamos a cabo ó longo de case 90 Km, atravesando algunhas das máis fermosas paraxes Galegas: Dende o impresionante cavorco do Sil na Ribeira Sacra, pasando pola Serra de San Mamede e Manzaneda, ou ben  visitando mosteiros como Montederramo, e ás veces alongando o itinerario previsto con Pequenos Recorridos como o que nos conduciu dos balcóns de Madrid  a Santa Cristina.
É de agradece-la elevada participación que recibiu este proxecto, alcanzando o cento de participantes en total, repetindo moitos deles a súa presencia en varias etapas, non baixando ningunha das mesmas de 20 persoas.
Non poderiamos esquecernos da información facilitada polo Club Alpino Manzaneda, así como da hospitalidade de Gerardo, o que nos fixo gozar enormemente da nosa estancia en Chandrexa, tanto polo seu bo facer, boa mesa e axuda en aclararnos certas dúbidas do recorrido sobre o terreo.
O noso próximo obxectivo, e ó que vos animamos a participar, é camiñar dende Cabo Ortegal ás Dunas de Corrubedo, tendo como punto intermedio Betanzos ó longo do GR 50 Ruta do Medievo e o GR 52 Ruta dos Ríos, en total 283 Km por etapas. Pero como dixo Kipling, iso xa é outra historia.

SENDEIROS INVERNO-PRIMAVERA 2002
Presentámo-lo calendario para a nova temporada, con el pretendemos continuar coa liña de combinar Grandes Recorridos, rutas novas  e saídas de fin de semana. Como poderedes comprobar aparecen novas opción e rutas, manténdose algunhas que polo seu interese se conservan ou se volven recuperar.
Trataremos de introduci-las marchas nocturnas, un pouco esquecidas hoxe en día, comezando pola xa clásica Galiñeiro-Aloia. Tamén é a nosa intención que Sendeiros sexa unha introducción a novas metas, por iso planificamos saídas de montaña pola nosa xeografía, tales como Ancares e o Xistral. Esta opción é de agradecer a algúns veteranos de club, os que puxeron a súa sapiencia á nosa disposición.
Outra oferta que presentamos son as rutas temáticas, por exemplo os Castelos de Galicia, con sendeiros ou marchas que enlacen co noso patrimonio histórico, como no caso da Ruta de Mondariz-Vilasobroso ou a de Goian.
Entroncando estas saídas temáticas cos GR, temos pensado camiñar os 90 Km que unen Betanzos con Cabo Ortegal: GR 50 Rota do Medievo, e a menor escala (50 Km) , o Camiño da Franqueira (GR sen Homologar).
Contamos coa vosa participación e colaboración para poñer en practica este calendario, agradecendo calquera idea que nos poidades aportar para mellora-las actividades propostas para este novo ano que se nos presenta.

Rafavei

Non foron os catro días da ponte da Constitución como estaba previsto, pero si foron dous días, o sábado e o domingo. Non fixemos máis que chegar ó refuxio, prepara-las cousas de topografía e marchar para Rafavei ou Sima do Penedo. Alí estivemos ate acabar de toma-las medicións dos puntos que faltaban para a topografía, agora so falta que as medidas saian do caderno de notas e automaticamente se traspasen a papel para que os trazos os unan e formen un plano bonito e descritivo de como é a cova. Algún día destes será.

Xornadas biolóxicas en cavidades

Celebradas en Cobas -zona de Zorra e Despiste- contamos coa inestimable colaboración do experto de "bicholoxía" e membro do club, Jorge Ramos que veu dende A Coruña para pórnos diapositivas e falarnos dos bichos das covas.
O sábado dedicámolo á preparación dos bote-trampa, cun exquisito queixo azul, e instalación das mesmas na cavidade de A Zorra, escollendo os lugares  máis apropiados, resultando complicada a ubicación porque a cavidade estaba moi seca e tiñamos que buscar con lupa as zonas húmidas preto ás coladas ou similar. Puxemos seis trampas. O domingo chegou Jorge para encerrarnos na escuridade do refuxio a ve-las diapositivas e atender a charla. Logo fomos recolle-las trampas cos seguintes resultados: dous botes estaban tombados e  esfumado todo o seu contido (algún atrevido troglóxeno tivo menú extra), outro bote albergaba unha parella de  dous carábidos (de distinto sexo): Antisphodrus (Ceuthosphodrus) pelaeus ssp Gallaecus dándose un banquete, os demais botes non tiñan nada. Observamos tamén un total aproximado de 30 morcegos por toda a cavidade localizando os de Ferradura grande e o Liposidelus. Á tardiña, recollida e, con novos coñecementos, para casa.

Susto en Cobas

Coincidindo coas datas de fin de ano fomos a Cobas para explora-la K-1 e facer algo de prospección.
Con pouco tempo, esta última consistiu na recollida de información de dúas cavidade pola zona, que trataremos de localizar nas próximas semanas.
Mais cando volvemos a xantar, o primeiro de ano, durante a comida escoitamos raros ruídos no teito da cociña. Localizados,.... ¡lume!. Si. Despois de retirar algunhas pranchas do falso teito...¡¡¡lume!!! Unha das vigas centrais e as laterais próximas estaban ardendo. Axiña nos levantamos a fume de carozo (inda que o lume estaba no tellado) e dous ós extintores, un ó móbil para pedir axuda (débese facer ó 112 SOS Galicia) e os demais a saca-las cousas para fóra. Tan concentrados que ninguén sabía que facía o outro grupo.
Perfecto funcionamento dos dous extintores e dos que, envolvidos en escuma branca, respirando "daquela maneira", asomaron primeiro polo falso teito con eles, e logo subiron polas vigas para remata-lo lume. Xa todo estaba fóra e os bombeiros en camiño desde A Rúa.
Cun ollo nas vigas e outro no descanso, preparámonos para a seguinte acción: empapa-las vigas de auga, para evitar brotes de lume posteriores. Cadea humana para facelo e comentarios de todo tipo.
Primeiro chegaron dous bombeiros. A pé... Si, a pé, pois o camión non pasaba polas casas de Cobas. Incrible. Un parque de bombeiros en A Rúa, para toda a zona de Valdeorras (con aldeas, pistas,....) e non entran por Cobas. Non queremos pensar cantos.... si, cantos lugares son inaccesibles. ¿Dependerá da sorte? ¿Dependerá da sorte que poidan chega-los bombeiros en pleno 2002?
Fixéronse cargo e revisaron tódalas vigas. Perfectas, sen perigo de volver plantar lume. Moi ben apagado. Chegaron 15 minutos despois, tamén correndo, outros tres bombeiros, dous con extintores e un con sacho e palas.
Avisamos á federación e máis ó Club, e..... xa contaremos se hai novidades. Só nos queda dicir ¡GRACIAS Eutimio!.

Espeleonovas
 A destacar neste mes:

• Asemblea e cea anual. Este ano no refuxio do Aloia, o venres 18. ¿Estás apuntado/a? ¿A que esperas?
• Catálogo de Canóns de Galicia. Anímate e colabora na súa elaboración. Hai moito traballo por diante.

ACTOS SOCIAIS DOS VENRES

REUNIÓNS
 

• 25 Xaneiro Voluntarios para a marcación de sendeiros. No Club ás 21:30 h.
• 22 Febreiro  Bolivia 2002. No Club ás 21:30 h.

ACTOS SOCIAIS DOS VENRES
 

• 25 Xaneiro  Viaxe no Sedov, o veleiro mais grande do mundo, por Felipe, vídeo. No Club ás 20:30 h.
• 1 Febreiro Trekking do Everest 1998 por Fernando Fernández, proxección de diapositivas. No club ás   20.30 h
• 8 Febreiro Pretensións e actualidade da mítica cova do Rei Cintolo, por Sección de Espeleoloxía do   club, charla. No Club ás 20:30 h.
• 15 Febreiro Botiquín de media e baixa montaña por María Villaverde e Protección dos ollos na monta ña, por Ramón García. Charlas. No club ás 20:30
• 22 Febreiro  Material de montaña,  por Luis Arocas, da Tenda Terra. Charla. No Club ás 20:30 h.

  XANEIRO

  26-27 Espeleoloxía. Catálogo Canóns
  26-27 Saída Infantil - Xuvenil.  Cabeza de Manzaneda
  26-27 Montañas de Galicia: Trevinca
  27 Rota Da Auga. PR G59 Caldas De Reis

  FEBREIRO

  2 Cena 60 Aniversario.
  2-3 Curso Iniciación Espeleoloxía (E.G.E.)
  2-3 Curso Esquí de Montaña (E.G.A.M.)
  3 Bici de montaña. A Grova
  9-10 Saída Alta Montaña
  9-10 Curso Iniciación Espeleoloxía (E.G.E.)
  10 Castelos de Galicia: Goian  Niño Do Corvo Castelo de San Lorenzo
  10 Cultura. Saída Ornitolóxica
  11 Festa Infantil de Entroido
  16-17 Curso Iniciación Alpinismo (E.G.A.M.)
  17 Rural de Galicia Gr.94 Etapa I
  23-24 Ruta do Medievo Gr 50 Etapa I: Betanzos Monfero  Caaveiro
  23-24 Curso Perfeccionamento Alpinismo (E.G.A.M.)
  23-24 Espeleoloxía. Catálogo Canóns.
 
 

Para comunicarse có club, a dirección é m_celtas@yahoo.com.

Modifiquei esta páxina por última vez en Xaneiro de 2002.