En tódolos continentes existen montañas de diferente elevación con gran variedade de formas e climas, combinacións específicas de ecosistemas que van dende o ecuador ata as rexións polares.
Durante milenios as montañas foron fontes de valiosos recurso como a auga, a enerxía e a biodiversidade, así como centros de cultura e de recreo.
Pero hoxe en día fenómenos como a globalización, o turismo e a urbanización poñen en perigo ás comunidades de montaña e ós recursos que delas dependen.
En xeral as zonas de montaña enfróntanse á marxinación e á degradación económica e ambiental.
As Nacións Unidas proclamaron o ano 2002 como Ano Internacional das Montañas (AIM) co propósito de crear conciencia sobre a importancia planetaria dos sistemas montañosos.
Designóuselle á FAO a función de organismo director da AIM en colaboración cos gobernos, as ONGs e outros organismos das Nacións Unidas.
O AIM representa un paso importante un proceso a longo prazo iniciado no cumio de Río no ano 1992 co desenvolvemento do programa 21 no capítulo 13, titulado Desenvolvemento sostible das montañas. Dito programa deu ás montañas unha importancia similar ós temas fundamentais do debate mundial, como son o cambio climático, a biodiversidade, a deforestación e a desertización.
O AIM proporciona unha oportunidade única para reforzar a execución do capítulo 13 e promover temas propios das montañas a fin de que figuren ente as prioridades mundiais.
O AIM debería servir de catalizador para unha acción concreta, continua e a longo prazo que supere o ano 2002.
Entre os obxectivos do AIM están.
· Asegura-lo benestar presente e o futuro das comunidades de montaña, promovendo a conservación e o desenvolvemento sostible.
· Incrementa-la conciencia, así como o coñecemento, dos ecosistemas de montaña.
· Atende-las situacións de conflicto que ocorran nas zonas de montaña e promove-la paz.
Os montañeiros temos moito que dicir neste senso, historicamente antes de que existisen este movementos relativamente recentes de defensa da natureza e o medio ambiente, nós xa tiñamos feita moita labor.
Alá polo principio do século pasado os montañeiros a nivel mundial fixemos fronte común en defensa do noso espacio, as montañas.
Hoxe en día estamos a sermos afastados e excluídos do moitos foros e incluso algúns considérannos unhas figuras incómodas.
Pido para este Ano Internacional das Montañas o noso pleno recoñecemento a nivel mundial como interlocutores válidos e defensores históricos das Montañas.
Celtis Lupus
 

Campamento de Verán da F.G.M.
A federación vai organizar para os federados máis mozos un campamento en Muíños (Ourense). O prezo será de 185 € e está subvencionado pola federación. As datas son de 30 de xuño a 8 de xullo para os rapaces de 8 a 12 anos e de 20 ó 28 de xullo para aqueles de 13 a 16 anos.
 

Información Asemblea Ordinaria F.G.M. 2002
Infórmase do nomeamento de novo Tesoureiro na persoa de Evaristo Fandiño. O antigo tesoureiro, Roberto Arbones pasa a ser Vocal.
Infórmase que se espera terminar co Refuxio do Xuído este ano.
Aprobáronse as actas da asemblea do 2001 e léronse as actividades do ano 2001.
Para a organización das actividades federativas do ano 2003, a proposta do Club Peña Trevinca e votada na Asemblea, a Federación enviará carta ós clubs solicitando proxectos para ditas actividades. Posteriormente, e examinados ditos proxectos, asignará as actividades seguindo os criterios apropiados.
O título de mellor club de Galicia o gaña o Club Montaña Trevinca - Vigo, con 288,29 puntos. Club Montañeiros Celtas acada 244,60 puntos, seguido de Ártabros con 79,34 puntos.
 

Proba de fondo: Marcha das Greas
O sendeiro das Greas (GR.-58) ten algo máis de 200 km de lonxitude ó longo da Mancomunidade de Vigo. A finalidade desta proba de fondo é dalo a coñecer  camiñando, en varias etapas, polos fermosos lugares que nos ofrece nos distintos concellos que forman o entorno de Vigo. Nesta 1ª etapa percorrerémo-lo tramo menos rural do sendeiro, pero non por iso está exento de fermosos lugares e inmellorables vistas.
O prezo de inscrición é de 10 €, a data límite é do 25 de abril, máis información no club ou na F.G.M.

XIII encontro Internacional de mozos escaladores Pedraforca 2002.
A Federación Española de Deportes de Montaña y Escalada organiza o encontro antedito para aqueles escaladores que posúan a licencia federativa e teñan entre 16 e 25 anos. Esixíndose como nivel técnico escalar de 1º de corda en vías semiequipadas deunha dificultade Vº, ter experiencia en vías de varios longos e saber protexerse con empotradores e friends.
Este ano a actividade desenvolverase no Macizo de Pedraforca.Refuxio de Lluís Estesen (2.497 m).
O prezo da actividade é de 150,25 € incluíndo viaxe en autocar dende Barcelona ata o Pedraforca, estancia no refuxio en réxime de pensión completa dende o domingo pola noite ata o sábado o mediodía.
Para máis información podedes preguntar no club.
 
 

Comezamos este mes de primavera desexándovos a todos que cos días máis calorosos e longos poidamos gozar dun maior contacto coa natureza que tanto botamos de menos nas cidades. Quizás as actividades culturais sexan menos atraentes polo maior tirón das actividades ó aire libre, pero en todo caso, estas tamén son unha forma de cultura, tan importante como a outra.
 
SAÍDA BOTÁNICA

TERTULIA

A tertulia do mes de Marzo, de tema: As relación na montaña, tivo as seguintes conclusións.
Unha relación en montaña pode levar a relacións de mutua confianza moi grandes e a todo o contrario, a grandes enfrontamentos, que as veces se sobreleva co obxectivo de ascender un cumio e sen que prime a convivencia.
O líder axuda á boa relación na montaña.
Á organización correcta da actividade tamén colabora unha boa relación dos participantes.

A tertulia do mes de Abril, tivo de tema: A influencia dos trebellos modernos na Montaña. Tivemos as seguintes conclusións:
O levar moitos trebellos á montaña pódenos levar a afastarnos da realidade da montaña e de nós mesmos.
O uso racional do móbil é moi positivo en montaña, ex. comunicación de grupos separados, seguridade e chamadas sen abuso.
O uso do Gps, estase xeneralizando moito e, nalgúns casos, sácaselle pouco proveito, por descoñecemento, falta de mapas especializados e por mal uso.

A tertulia do mes de Maio terá como tema: ¿Como facer Vigo máis habitable?, e realizarase o xoves 9 de Maio ás 21 h.

CONCURSO LITERARIO

 Volvemos convocar un concurso literario para este ano que coincide co 60 aniversario do club.

Datas: Recolleranse os traballos no período do 1 ó 15 de Xuño.

Tema:  A Forza da Natureza.

Extensión: Unha folla tamaño A4, cun máximo de 40 liñas.

Presentación: Escrito a máquina ou ordenador, dentro dun sobre no que figure no anverso CONCURSO LITERARIO 2002, no interior do sobre axuntarase unha folla co traballo e outra co nome, apelidos, data de nacemento e nº de teléfono. Os traballos poderán ser en galego ou en castelán.

Premio: Haberá 3 premios, un para cada categoría: Ata 14 anos. Entre 14 e 18.Máis de 18.

Publicación do traballo: Os traballos premiados serán publicados na circular do Club.

Inventario. Vaise proceder a inventariar todo o material de montaña do club. Por isto durante o mes de maio non será posible retirar material para a súa utilización particular

Esta Semana Santa fomos ó val da Pineta nos Perineos, dende onde puidemos realizar diversas actividades partindo do cámping do mesmo nome e que se encontra no centro do val. Por certo, que debo dicir que o persoal do cámping tratounos moi ben.
Despois das terríbeis 13 horas de autobús, chegamos o xoves ó cámping a iso das 13 h, repartímonos polos cuartos e picamos algo da comida que traiamos. A penas unha hora máis tarde fomos dar un paseo que terminou ás 19 h xusto cando xa se estaba facendo de noite. Partindo do cámping fomos cara á vila de Espierba e logo tiramos ó cordal da serra do mesmo nome para subir ó Comodoto, mais vendo a hora dimos a volta a medio camiño porque facíasenos de noite antes de volver ó cámping.
O venres, despois de falar co persoal do cámping decidimos que o proxecto de subir o collado de Añisclo dende o cámping é demasiado perigoso, polo que collemos o autobús cara a Nerín, subindo dende aló ó collado de Arenas. Alí volvemos a falar cun vixiante do refuxio que alí hai e dinos que é imposible seguir subindo co tempo que vai (está nevando e hai néboa). Un grupo de aguerridos montañeiros decide intentar subir o collado de Añisclo polos Llanos da Ripareta, o resto baixa polo Barranco Pardina cara ó barranco de Añisclo e de ahí á ponte San Urbez. Ó final o grupo que tirou para arriba tivo que dar volta polo tempo e todos nos atopamos en San Urbez, non sen que os que máis e os que menos tiveran que contar algunha aventura. Pero o cavorco de Añisclo foi unha bonita recompensa ós nosos esforzos, é realmente un entorno precioso e non demasiado estragado polo turismo.

GR 50 RUTA DO MEDIEVO ETAPA I : BETANZOS-MONFERO-CAAVEIRO
23-24 de Febreiro de 2002
Unha vez chegados a Betanzos os 23 participantes, remontámo-lo Río  Mandeo, decorado polos tenderetes da Festa dos Caneiros. Ascendemos a Vilamourel e de aí á igrexa de Santiago en Adragonte. Antes de xantar na escola de  Lapido atravesamos bosque.
Unha vez xantamos buscamos infructuosamente un Bar, pois a abstinencia do café afectábanos. Nun dos cruces, o  que guiaba a marcha despístase e desvíanos da ruta, caendo no leito do Río da Vella.
Para endereza-lo noso camiño seguimos o Rego da auga dunha minicentral , alcanzando de novo o sendeiro marcado na aldea de San Mamede, onde podemos observar uns corzos (¿?) que escapan furtivamente das nosas miradas.
O cansazo empézase notar e costa máis avanzar, encontrarnos con pistas asfaltadas tampouco axuda. Na Aldea de Capelo sufrimos unha baixa por sobreesforzo, terá que esperar a  que o evacúe o autobús, sen máis incidente. Chegamos a Rebordelo (Monfero) antes do anoitecer.
As xestións realizadas cos Párrocos de Monfero para conseguir aloxamento  permítennos pasa-la noite na Rectoral (moi agradecidos  pola atención prestada polos mesmos, Álvaro e Miguel) e incluso ducharnos con auga quente.
No Bar de Carmen, a propietaria tramitounos unha suculenta cea nos Muíños de Pontedeume, ante a imposibilidade de conseguir viandas en Rebordelo (tamén moi agradecidos  a Carmen).
Ó día seguinte almorzamos e dirixímonos ó Mosteiro de Monfero, o que, a pesar de estar cerrado por la temperán hora á que acudimos, desvélanos a súa espléndida planta, quedando a súa visita para outra ocasión.
O autobús permítenos acurtar tramos de chapapote e retomámo-la ruta a pé nas proximidades do Penedo Gordo, por camiño dirixímonos a Castiñeira, pasámo-lo Cámping  que está fóra de servicio por ser inverno (pero que recomendamos polas súas boas instalacións e bo trato dos donos) e comezámo-lo descenso , non sen outro despiste do guía (en que estaría pensando¿?) polas Fragas do Eume, o bosque ó estar espido permítenos ve-la canle do río.
Comemos na Central Eléctrica do Río Parrote. Seguímo-la nosa marcha ata  ó longo do Eume, ata chegar ó recóndito Mosteiro de Caaveiro, o lugar , elixido por San Rosendo para escapar das Incursións Viquingas (grandes turistas onde os haxa), absórbenos pola súa beleza, na ponte cerca do cenobio, algún/ha encontrou  a relaxación total.

GR 50 RUTA DO MEDIEVO ETAPA II: CAAVEIRO-CASTELO DE NARAIO
6-7 de  abril  de 2002
Outra vez polas Terras do Porco Bravo, antigo animal heráldico dos Señores de Andrade. Dende  o mosteiro de Caaveiro ascendémo-las Fragas d Eume ata a Capela  de aí por pistas chegamos ata as Neves, o tempo é bo a pesares dos malos prognósticos para a fin de semana. Descendemos ata o Río Belelle onde comemos antes de que unha tormenta con pedrazo nos caia de improviso (a que nos viu enriba). Retomámo-los sete participantes o camiño, moi deficientemente sinalizado, ata chegar a Pielas, onde despois de baixar  por un carreiro infestado de Toxos tomamos pista ata as proximidades dunha minicentral vixiada por ocas, aquí márcase o inicio da ascensión á fortaleza de Naraío, a cal está coroada de chanzos de madeira, un pouco esvaradíos polas choivas. O Castelo, que de lonxe parece pouco atractivo, cámbianos de opinión a medida que sorteámo-los angazos da súa entrada e chegamos á base da torre da homenaxe de estilo normando. Encravado sobre un promontorio rochoso, parece un pequeno niño de aguias, moi pouco accesible, dende onde se poden contemplar magníficas vistas, acrecentada a beleza das mesmas polas brétemas que se levantan nos bosques veciños. Como curiosidade  este castelo pertenceu a Andrade O Bo (A súa sepultura ataviado de armadura podémola visitar no mosteiro de Monfero), o cal dixo ante a moda dos feudais da época de asignarse dubidosos títulos nobiliarios, que el prefería ser antes un bo cabaleiro antes que un mal conde (de Andrade  O malo, o seu retoño, tamén enterrado no mesmo mosteiro mellor non falamos, tiña o feo costume de extorsionar ós seus vasalos tirándoos ó Eume atados de cordas).
Despois de varios transbordos en coche, pernoctamos no Ximnasio Municipal de Neda, gracias  á xentileza de Manuel Grueiro, funcionario municipal que nos deu todo tipo de facilidades. Ó día seguinte a choiva pertinaz intimídanos e decidimos  desviarnos á Coruña e pasa-lo día alí visitando o Acuario (Por certo non hai peixe na carta do restaurante) e a Torre de Hércules. O Castelo de Moeche queda para outra ocasión.

SERRA DO XISTRAL: TERRA DE EXCESOS
9-10 de marzo de 2002
Curiosa terra esta do Xistral, chea de contrastes, natureza indómita e ceas descomunais das que están as sepulturas cheas. Os primeiros participantes que chegamos entre o venres e o sábado pola mañá cruzamos, a modo de Rubicón, o Eume pol ponte de Samil, e ascendemos ó Peñote (786m de boas vistas: O Xistral, Terra Cha, As Pontes,....). Retomámo-la marcha atravesando a Serra da Carba, onde magníficos cabalos libres impresiónannos o saírnos ó paso. Despois de comer no bosque, caemos outra vez ó Eume. A partires deste punto saltamos aramadas de tódalas formas e estilos posibles (por abaixo, por arriba, de lado, con pose , sen pose, ....), e incluso atravesamos literalmente de parte a parte unha casa utilizada de cortello para poder segui-la nosa ruta (Gracias a Ana) e chegar á igrexa de Acibreiros, inicio da nosa andaina.
Xa en Viveiró unésenos o resto do persoal, e procedemos ó noso segundo reto do día: sobrevivir á cea que a Sra. Cándida nos ten reservada, 6 pratos (un pouco máis lixeira que un xantar). Con gran alegría pola miña parte consigo chegar ó último prato sopesando as miñas forzas e capacidade de resistencia para tan duras labores. Por fin coroo a proeza coas sobremesas (¡3 sobremesas 3!).  Café e licores. Conseguín superar con creces a miña anterior marca, situada en cinco pratos e dúas sobremesas!!.
O día seguinte o Xistral. M. P., madrugador coma sempre, espértame antes da hora (non o podo estrangular, hai demasiadas testemuñas, así que me conteño), e murmuro algo inintelixible sobre o cocido da noite e pésimo estado en que me levanto: como se un Menhir me caese de cabeza ó bandullo, pero hai que subir. Despois de remata-lo almorzo no mesmo lugar que a cea perpetrada a noite anterior, procedemos co ascenso ó Xistrar (1032m) e de aí ó Cuadramón (1056m), con gran asombro pois a choiva non nos chafou o cumio coma en anteriores ocasións. ¡ Magnífico día soleado!. Despois de xantar abeirados do vento nunha das abas, chegamos  Coruxos onde os veciños inda se lembran das nosas andanzas por aqueles lares durante o ano pasado.
Ó final chegamos ó refuxio de Viveiró onde están os coches. Un día memorable, como dixo Manuel: ¡Aramado sexa o Xistral!.

GR-SH CAMIÑO DA FRANQUEIRA. ETAPA II.  A FRANQUEIRA -MONDARIZ
domingo 24 de marzo de 2002
Case 50 participantes saímos da Franqueira en dirección Mondariz, onde deixámo-los coches para o regreso, descendemos por prados, bosques , regatos e por fin estrada ata o Tea. Onde comemos , entre muíños e pasos de pedra. Seguímo-lo fluír do río por camiño de pescadores, e saltamos varias praias fluviais ata chegar a Mondariz Pobo, onde os conductores organizámo-lo regreso en Coche ata o punto de inicio. O resto do persoal continúa a pé ata o balneario onde está o punto de encontro.

VI Campamento Galego
Infantil-Xuvenil de Espeleoloxía
Neste ano no que en  Club Montañeiros Celtas celebrámo-lo 60 aniversario, renovámo-las nosas ganas, nunca perdidas, de iniciar e promocionar entre os máis novos a espeleoloxía, coa organización do VI Campamento Galego Infantil- Xuvenil de Espeleoloxía. Para acadar estes obxectivos xerais, queremos que o campamento sexa, ademais, unhas xornadas de convivencia en plena natureza, para o que serán organizadas, paralelamente, unha serie de actividades nas que primen a relación, a convivencia, o coñecemento,...
Gustaríache participar, pero... ¿que precisas?. En primeiro lugar, ter un máximo de 18 anos, e te-la licencia de espeleoloxía. A licencia sácase no club. ¿Que cando e onde se celebra? O 17,18 e 19 de maio, en Veiga de Brañas (O Cebreiro). ¿Como vas e volves? Déixao nas nosas mans. Levámoste e te traemos. ¿Precisas coñecementos ou experiencia previos? Para nada. Trátase de iniciar ós que lles interese a espeleoloxía. ¿Que logo non te gusta? Dudámolo, pero non pasa nada. ¿Anímaste? Apúntate. A sección de espeoloxía reúnese os xoves, ás 20'30 horas. Vén. Explicarémosche o que queiras.
Ah, esquecíamos. Os almorzos e algunhas ceas ou xantares son por conta da organización. Tamén sortearemos material de espéleo. Para esto contamos coa colaboración de patrocinadores, que colaboraron con Montañeiros Celtas. Algún quere ser descoñecido. Gracias a todos.

Catálogo de Canóns de Galicia
Continuamos traballando. Logo da zona da Groba, no que inda nos queda unha tarde de traballo, imos á do Canón do Sil. Instalando se é preciso, topografiando, elaborando croquis de acceso, fotos,... e gozando do traballo.
O 23-24 de febreiro, a primeira saída programada para recoller información de canóns, foi no río da Cal. Alí nos organizamos en grupos, dedicándose uns á revisión dos datos topográficos ou instalación, outros á fotografía (que teremos que repetir, ¡pena porque tiña a carga adecuada de auga para boas fotos!) e outro grupo como apoio, fóra da auga tomando notas de accesos- regresos, tempos, etc. O domingo, unha infructuosa prospección por tramos do río Tamuxe rematou o fin de semana acuático. Gozamos de dous días primaverais, agás un pequeno incidente de dous anaquiños de "piños" incrustados na rocha, nove espeleólogos e dous colegas da Sección Infantil que logo se sumarán á Sección de Éspeleo, ¡entrariamos na Sección Infantil se a idade nolo permitira!
En marzo tivemos que reaxusta-las datas previstas dalgunha actividade por causas de forza maior, como se di. Así  as Xornadas de Instalación e Equipamento de cavidades, que neste caso cambiamos a canóns, trasladáronse a Abril, celebrándoas o día 7  no río Mougás, alí instaláronse algúns anclaxes para estudia-la maneira máis axeitada de facelo e o mesmo tempo mellora-la instalación existente. Non tivemos tempo de rematala en todo o descenso, queda para outra xornada, na que aproveitaremos para completa-los datos tanto de achegamento como de topografía deste tramo "vertixinoso" e fotografía para ir documentando os canóns desta Nosa Terra.
A parte teórica das Xornadas foron impartidas no club, o venres 5 de abril, por Jesús. Máis que interesantes. Gracias, Jesús.

Saída a Liñares
Unha data que non será esquecida facilmente, o 16/17 de marzo, unha data que sairá máis dunha vez en distintos documentos. Unha actividade que pode pasar desapercibida porque é unha saída a covas como a de calquera outra fin de semana. En Liñares, entorno de tantas e tantas actividades espeleolóxicas, as cavidades visitadas, tamén as tan coñecidas Cova do Tarelo e o Tin-Tan. Nada especial, comemos: tortilla, empanada; coma sempre: espaguetis, froita, ... Ninguén veu pedir ningún autógrafo. Tampouco houbo xornalistas, ... pero si estaba unha muller, unha muller con maiúsculas, que era unha compoñente máis do grupo. Unha muller que derredor do ano 1980, sendo unha nena, fixo as súas primeiras incursións nas cavidades galegas co gallo do XXV aniversario da primeira expedición á cova do Rei Cintolo e na famosa Operación Caurel, onde se descubriron tantas cavidades importantes pola súa lonxitude e/ou verticalidade e polos restos  paleontolóxicos. Unha socia de Montañeiros Celtas, que polo simple feito de selo, chegando a onde chega co seu tesón, fainos a tódolos socios un pouco máis importantes por estar nunha entidade que ten unha historia "emocionante" que avala a súa existencia. Esta persona para nós, Chus Lago, volveu a embarrarse despois de tantos anos, nunha fermosa cavidade, O Tarelo, coa súa cámara en man acumulando recordos para o mañá. O Reencontro sucedeu, poderíamos pórlle moitos títulos pero preferimos que sexa Chus a que lle poña o que máis lle guste. Foi todo un pracer comparti-lo medio subterráneo con Chus que coroou a Cima do mundo, de xeito tan sobresaínte, e pode chegar a "Sima" do mundo. Estariamos encantados de comparti-lo camiño.

Semana Santa en Teruel e Alto Tajo
Despois de tres días, con visitas e pateos (ata a lagoa de Taravilla) polo Alto Tajo, instalámonos na turolense Montalbán, onde o galo cantaba a calquera hora do día, ou da noite, e a buura orneaba pola madrugada. ¿E como orneaba!
Continuamos polas rutas xeolóxica de Aliaga e xeolóxica- cultural do río Martín (trouxemos os libros para a biblioteca do Club).
Á primeira mañá que non nos espertou a burra era fermosa e moi soleada, e coma sempre levantámonos, almorzamos e preparamos todo para irmos facer covas. Pero non, non pensedes que isto é así de fácil. Primeiro había que atopa-la cova. Paramos en Ejulve para busca-la chave no Concello e proba-los xamóns que din, e din ben, que saben riquísimos.
A calor cebábase en nós, pero non tardamos moito en atopala, aínda que non serían polas boas indicacións que nos deran, porque o único certo era que a cova chamábase Recuenco. Baixamos a xantar, como non, a especialidade da sección, bocata de leituga, moi bos, por certo. Logo, volta a subir ata a cova. Fermosísima, chea de aragonito e con moitos recunchos que te levaban ós mesmos sitios, así que gozamos coma ananos naquel labirinto. Nos metiamos por un oco, logo por outro, e logo,... cando saiamos xa era noite. Parada na entrada para recarga-lo depósito, e mentres tomabamos un queixiño mirabámo-las estrelas, que alumeaban a noite cunha luz especial.
Voltamos a Ejulve (a devolve-la chave) e logo a cear e durmir, a ver se ese galo non cantaba ás tantas da mañá, porque houbo quen pensou ata en regalarlle un reloxo. Creo que non o ía entender, así que, ¡ para que gasta-los cartiños!
Desta vez non acertei. O galo cantou cando xa eran as doce, case a unha. Ese día aínda estabamos no campamento, xa que antes de marchar tiñamos que deixar a Pachi, que ía a Zaragoza de visita familiar. Xa imaxináde-lo que pasou ¿verdade?  Non colleu o bus na parada que o tiña que facer, pero non porque sexamos tan impresentables, senón porque o bus non pasaba por alí. Seguimos ata a seguinte parada,a ver se había sorte. ¡Puf! Polos pelos. O conductor, que estaba xa arrancando, tivo que esperar a que todos nos despedísemos do noso cu. Xa se sabe iso de que o teu cu é o meu cu.
Collémo-los coches e fomos ata o pozo, que eu máis ben lle chamaría buraco negro, porque impresiona moito, e é que San Pedro tiña unha boca enorme ¡Que medo! Tíñamos que colgarnos dunha plataforma, na cal, xa non había nada embaixo. (Pozo de San Pedro: 90m diám, 90m profundidade)
Os que quixemos baixar fómonos preparar e comezamos a baixar. Pero antes sacamos a foto por se non volviamos. Aquelo daba moito medo. Primeiro case non podías coa corda; e logo, cando xa case chegabas ó chan, corría demasiado ¡A tecnoloxía dos ascensores que aínda non chegou tan fondo! E falando de fondo, mirade se era fondo que dende arriba parecíanos que había vexetación baixa, uns cantos arbustos. Pero non, non eran arbustos, eran árbores, grandes figueiras, aínda que non o creades. E tamén tiña un lago, que pouco anaco de terra nos deixaba para estar alí.
Por nós, quedariamos alí toda a noite, porque si, era de noite, pero tiñamos que subir, que logo íamos á Tamborrada. Comezamos a subir e tamén comezou chover. Todo saiu ben agás que lle tiveron que botar unha man a alguén, e non miro para ninguén porque non teño un espello diante, pero logo estivemos todos arriba. Cambiámonos e fomos a Samper de Calanda, de Tamborrada ¡Como lle daban ós tambores! E que rico estaba o bocata de xamón.
De volta comezou a nevar ¡que frío! e cando chegamos, as tendas estaban cubertas de neve, todo branco, e claro, ¡tiñamos que sacar unhas cantas fotos!. Logo fomos xunto dos sacos, que xa nos estaban botando de menos.
O seguinte día fomos de turistas a Albarracín e Teruel. Pero sen dúbida algunha o peor día, e todo por culpa de Gordillo, que menudas indicacións, foi o día seguinte. Fomos buscar unha cova, e non a atopamos, quedounos doído o amor propio. O que se que atopamos foi a Sandalia de Xesucristo, que a donamos ó Club, así que se a vedes por aí, xa sabedes quen a atopou. Pero a nós non se nos resiste ningunha cova e menos a "Cija de los Royos", así que quédanos pendente ir, e xa sabes o que tes que facer se queres vir demostrarlle o amigo "Gordillo" que con este grupiño de espeleólogos non hai quen poida.                   Unha espeleóloga co amor doído

Espeleonovas
Atención ás vindeiras actividades. ¿Para participar? Ganas, e licencia. Animarvos.
27/28 abril.   Catálogo de Canóns. Ribeira do Sil.
17/18/19 maio.  Organizado por nós, VI Campamento    Galego Infantil- Xuvenil de      Espeleoloxía.
25/26 maio.   Catálogo de Canóns. Voltamos ó Sil.
1/2 xuño.   Curso Descenso de Canóns. F.G.E.
29/30 xuño.   Campamento de Canóns. F.G.E.
 
 

A Operación Benxamín está orientada  como unha iniciación ó montañismo, encamiñada a fomentar a afección do deporte en plena Natureza e o respecto á mesma. Nela trátase de formar ós participantes dun xeito teórico e práctico nas variadas facetas que presenta esta actividade deportiva.
Está dirixido a nenas e nenos de idades comprendidas entre os 8 e 14 anos.
Á fronte deste curso encóntranse monitores do Club Montañeiros Celtas, con gran experiencia na práctica do Montañismo e no trato e ensinanza infantil-xuvenil. A experiencia e prestixio que Club Montañeiros Celtas alcanzou para desenvolver este curso, ven avalado polo feito de ser este o XXXV ano consecutivo que se realiza, e sempre con indubidable éxito.
No transcurso das saídas instruirase ós cursillistas en diversos temas: Medio ambiente, coidado da natureza, convivencia, lendas e tradicións dos lugares visitados, amais dos temas propios que comprende a realización do montañismo como poden ser: montaxe de campamento, o diferente material empregado en montaña, orientación, marchas, escalada, rapel, etc. ...
ACONSELLÁMOSVOS QUE:

É imprescindible levar ROUPA DE REPOSTO (por se nos mollamos).
O CHUVASQUEIRO debe levarse sempre aínda que faga bo tempo.
NON LEVEDES COUSAS COLGANDO polo exterior da mochila, podes perdelas ou rompelas.
Cando escollas a COMIDA, lembra que na Montaña debe ser alimenticia, de doada dixestión, pouco copiosa e facilmente transportable. Por exemplo: tortilla de patacas, bistés empanados, pescado fritido, empanadillas, sandwhiches ou bocadillos, queixos e froita.
O ALMORZO CORRERÁ A CARGO DA ORGANIZACIÓN. Tamén haberá leite despois da cea para quen o desexe.
Ter coidado de non ESQUECER OBXECTOS e roupa no autobús e zonas de acampada

MATERIAL NECESARIO

 Comida.
 Mochila.
 Mochila pequena.
 Saco de durmir.
 Esteira
 Botas (Treking).
 Roupa cómoda (chándal).
 Calcetíns (finos e grosos).
 Chuvasqueiro.
 Roupa de abrigo: anorak, gorro...
 Gorra.
 Cantimplora.
 Lanterna.
 Cubertos.
 Cantariño.

INSCRICIÓN    INSCRICIÓN    INSCRICIÓN
As inscricións poderán realizarse na secretaría do Club Montañeiros Celtas de 19:00h. a 21:30h. de martes a venres ata o martes 30 de abril. O número de prazas é LIMITADO (a inscrición cerrarase ó cubrirse as prazas). No momento da inscrición satisfarase o importe do curso. É imprescindible posuír a LICENCIA FEDERATIVA para a realización desta actividade. Aconsellamos a modalidade C da aseguradora Sabadell.

PROGRAMA

Xoves 2 20:30 horas: Apertura e presentación.
Proxección de diapositivas no local social do Club Montañeiros Celtas.
 

Sábado 4 Saída de Vigo ás 16:30 cara o Monte Aloia. Distribución no refuxio. Percorrido pola zona. Charla sobre material de escalada. Xogos nocturnos.

Domingo 5 Teoría e práctica da escalada (marcha opcional). Charla ¿como se fai unha mochila?. Recollida e xogos de despedida.
 

Sábado 11 Saída de Vigo ás 16:30 cara Pigarzos - Xesta (A Lama). Montaxe do campamento. Charla sobre a acampada, práctica de montaxe de tendas.  Concurso de cociña. Visión de estrelas.

Domingo 12 Marcha. Teoría e práctica de orientación en montaña. Recollida do campamento.
 

Sábado 25 Saída de Vigo ás 9:00 cara a Lagos de Sanabria. Charla sobre material na montaña. Marcha e xogos nocturnos. Travesía de montaña para os maiores (actividade opcional supeditada).

Domingo 26 Marcha de montaña. Recollida e despedida.
 

Xuño Clausura no auditorio do Centro Cultural Caixanova. Proxección de diapositivas do curso. Entrega de agasallos.
 
 

3   Maio,  venres MITOS E LENDAS NAS MONTAÑAS DE GALICIA  Conferenciante: CONSTANCIO VEIGA     GONZÁLEZ. Audiovisual. No  PARANINFO RECTORADO UNIVERSIDADE DE VIGO ás 20.00 h

10 Maio,  venres FERVENZAS DE XEO E MONTAÑAS VIRXES NO HIMALAYA Conferenciante: MIGUEL ANGEL VIDAL. Audiovisual. No PARANINFO  E.U.E.T.I.  (PERITOS) ás 20.00 h.

24 Maio, venres MONTAÑISMO, MÁIS QUE UN DEPORTE Conferenciante: ANTONIO FERNÁNDEZ PENA. No PARANINFO E.U.E.T.I. (PERITOS) ás 20.00 h.

 
 

VINDEIRAS ACTIVIDADES

MAIO
 
  4 Marcha de Fondo (F.G.M. - C.M.C.  C.P.T.): Marcha das Greas
  5 Sendeiro dos Megálitos. Toques - Melide
  4-5 XXXV Operación Benxamín. Curso de Iniciación ó Montañismo
  4-5 Curso Perfeccionamento Espeleoloxía (E.G.E.)
  4-5 Curso de Montaña (E.G.A.M.)
  11-12 XXXV Operación Benxamín. Curso de Iniciación ó Montañismo
  11-12 Curso Iniciación escalada en Rocha (E.G.A.M.)
  11-12 Montañas de Galicia: Serra do Xurés. Fontefrías
  11-12 Campionato Social de Pesca Submarina.
  17-19 Montañismo. Palentinas.
  18-19 Curso Perfeccionamento Espeleoloxía (E.G.E.)
  25 Andaina Popular Allariz (Concello de Allariz)
  25-26 XXXV Operación Benxamín. Curso de Iniciación ó Montañismo
  25-26 Espeleoloxía. Catálogo Canóns Galicia
  25-26 XV Marcha con Vivac (F.G.M.-C.P.Trevinca Vigo)
  26 Sendeiro Fervenza da Toxa
 

Para comunicarse có club, a dirección é m_celtas@yahoo.com.

Modifiquei esta páxina por última vez en Abril de 2002.